Birinchi liga. Mavsumning kashfiyot jamoasi: “Obod”!

Buni qanchalik amalladik, munosib bahoni o'quvchilar berishadi. Lekin har bir klub rasmiylaridan buning uchun alohida minnatdorchilik eshitib keldik.

Ortda qolgan mavsum-2014da birinchi liga uchrashuvlarini saytimizda yoritib borilishida asosiy ishni bajargan  4 nafar xodimimiz turli nominaciyalar bo'yicha eng yaxshilarni aniqladi.

Xususan bu yilgi mavsumda kashfiyotga aylangan jamoa “Obod” bo'ldi. Toshkent jamoasining debyut mavsumidayoq kichik bronza medallarini qo'lga kiritgani ham qaysidir manoda fikrlarimizni to'liq isbotlasa ajab emas. Umuman olganda Xayrulla Abdiev va Farhod Safarov boshqaruvidagi jamoa mavsum-2014ni yuqori darajada o'tkazdi deyish mumkin. Ko'ramiz kelasi yil ham “Obod” o'zini qanchalik ko'rsata olarkin.

Keyingi o'rinni band etgan “Mashal-2” ham yomon taassurot qoldirmadi. Dilshod Andaev boshchiligidagi jamoa bu yil yana birinchi ligadagi ishtirokini boshladi. Tarkibi asosan akademiya bitiruvchilaridan tashkil topgan bo'lishiga qaramay, muborakliklar jiddiy kurashdi.

Yana avvalgi mavqeini tiklab borayotgan Andijonning “UzDongJu” jamoasi ham birinchi ligaga qaytishini yomon boshlamadi. Nozim Mullaoxunov boshqaruvidagi klub yakunda 5-o'rinni egalladi.

Nukusning “Orol” jamoasi o'tgan yilga nisbatan ushbu mavsum barqaror o'yin ko'rsatdi. Nematulla Qutiboevga etarli sharoitlarni yaratib berilsa, kurashchan jamoa tuza olishini bu yil ko'rdik.
Kosonning “Alanga”si ham joriy chempionatda jiddiy kurashdi. Anvar O'rinov qisqa fursat ichida yaxshi jamoa shakllantira oldi.  

Kashfiyot jamoa:
“Obod” (Toshkent) - 17
“Mashal-2” (Muborak) - 16
“UzDongJu” (Andijon) - 12
“Orol” (Nukus) - 8
“Alanga” (Koson) - 6