Birinchi liga, G'arb. May oyining eng yaxshi murabbiyi Muxtor Qurbonov

Unga ko'ra ortda qolgan may oyida yaxshi natija qayd etgan "SHo'rtan" jamoasi bosh murabbiyi Muxtor Qurbonov bu safar g'olib chiqdi. Sababi shuki, g'uzorliklar oliy liga sari dadil qadam tashlamoqda. Jamoa may oyida ham birorta marotaba mag'lubiyatga uchramadi. Qurbonov jamoasi may oyida 5ta o'yin o'tkazdi va ularning barchasida g'alaba qozondi! Ushbu uchrashuvlarda g'uzorliklar yirik g'alabalarni qo'lga kiritdi. Jamoa hammasi bo'lib 5ta bahsda 16ta gol urishga erishdi. Bu har bir uchrashuvga o'rtcha miqdorda 3tadan gol demakdir. Bundan ko'rinib turibdiki, "SHo'rtan"da sermahsullik joyida.

2-o'ringa esa Spartak Murtazoevni munosib deb bildik. Jizzaxlik yosh murabbiy futbolchilikni yakunlab "Zomin"da murabbiyik sohasini boshlab yuborgandi. Spartak Suyunovich bu yil "Zomin"ni kurashchan jamoaga aylantira oldi. Uning jamoasi may oyida 6ta o'yinda maydonga tushdi. SHundan 4tasida o'z hisobiga uch ochko yozdirib qo'ydi. Bir o'ynda durang qayd etib, qolgan yana bir uchrashuvda raqibiga imkoniyatni boy bergan.

Jami 13 ochko yig'gan "Zomin" 12-turdan so'ng turnir jadvalida 3-o'ringa ko'tarilib oldi. Tabiiyki bunda Spartak Murtazoevning o'rni katta.

Nematulla Qutiboev aprel oyida ham eng yaxshi murabbiylar qatoridan joy olgandi. Nukusliklarning bu yilgi mavsumda ijobiy natija qayd etmoqda deyish mumkin. Kamtarona sharoitdan kelib chiqib, ishlayotgan qoraqalpoq o'g'loni mahalliy yoshlarni etishtirib, ularni yuzaga chiqarmoqda. "Orol" jamoasi may oyida 6ta o'yin o'tkazib, jami 7 ochko jamg'ardi. 12-turdan keyin esa jamoa turnir jadvalida 4-o'rindan joy egalladi.  
 
May oyining eng yaxshi murabbiyi
1. Muxtor Qurbonov - "SHo'rtan"
2. Spartak Murtazoev - "Zomin"
3. Nematulla Qutiboev - "Orol"