Belgiya ikkinchi bo'limda o'z "siri"ni ochishga majbur bo'ldi

Belgiya terma jamoasi haqida juda ko'p gapirilib kelindi. Ko'pchilik ushbu jamoa mundialda eng katta shov-shuv ko'tarishi mumkinligini taxmin qildi.

Uzoq kutilgan Belgiya terma jamoasining ilk o'yini ham yakuniga etdi. Vilmots shogirdlari birinchi turda Jazoir terma jamoasi bilan bahs olib borishdi.

Uchrashuv Jazoir terma jamoasi faolligi bilan boshlandi. Belgiya kutilmaganda o'yinni juda sust boshladi. Jazoir Vilmots jamoasini birinchi bo'limda anchagina qiynashga erishdi. O'yinning 25-daqiqasida Jazoir chap qanotdan hujum tashkil etdi. Bu vaziyatda Fegulini Belgiya himoyachisi Vertongen ushlab qoldi va jamoasi zarariga penalti ishladi. Jabrlanuvchining o'zi 11-metrlik jarima zarbasini bexato bajarib, Jazoirni hisobda oldinga olib chiqdi, 0:1.

Belgiya ha deganda o'z o'yinini topa olmayotgan edi. Ketma-ket noaniqliklardan so'ng, Vitsel uzoq masofadan darvozani nishonga olmoqchi bo'ldi. Lekin uning kuchli zarbasini Rais bartaraf eta oldi.

Birinchi bo'lim so'nggi daqiqalarida Belgiya yana bir chiroyli  hujum tashkil etdi. CHadli qulay vaziyatga ega bo'ldi va darvoza tomon zarba yo'lladi. Lekin uning tepgan to'piga aniqlik etishmadi. Jamoalar 0:1 hisobi bilan tanaffusga yo'l olishdi.

Ikkinchi bo'limda Belgiya o'ziga o'xshay boshladi. Ketma-ket hujumlarni yog'dirishni boshlagan Vilmots jamoasi Jazoir darvozasi oldida katta bosim uyushtira boshladi. Belgiya ustozi Mark Vilmots ikkinchi bo'lim avvalida Mertensni, keyinchalik Divok Origi va  Fellayni maydonga tashladi. Aynan shu futbolchilar ustozi ishonchini oqlashdi.

Uchrashuvning 70-daqiqasida Fellayni jarima maydonchasi ichida De Bruynedan ajoyib to'p uzatishni kutib oldi va boshi bilan juda chiroyli tarzda Rais qo'riqlagan darvozani nishonga oldi, 1:1.

Fellayni goldan ruhlanib, yanada kuchli o'yin ko'rsata boshladi. Bu jamoadoshlariga ham qo'shimcha kuch bag'ishladi va butun jamoa bo'lib raqiblariga bosim uyushtirishda davom etishdi. Divok Origi, Mertens va Fellaynilar ikkinchi bo'limda Belgiya o'yiniga yangilik olib kira olishdi. SHuningdek, De Bruyne va Eden Azar ham ancha faollik ko'rsatishdi. Uchrashuv yakunlanishiga 12 daqiqa vaqt qolganida de Bruynening jonbozligi tufayli Belgiyaning navbatdagi hujumi boshlandi. Ushbu hujumni Eden Azar rivojlantirdi va yakuniy zazbani Mertens aniq yo'llab, jamoasi hisobda oldinga olib chiqdi, 2:1.

Uchrashuv so'ngiga qadar ushbu hisob o'zgarmadi va Belgiya irodali g'alabani tantana qildi.

Ko'pchilik kutgan va qiziqqan Belgiya terma jamoasi ikkinchi bo'limda ishonchni oqladi va muxlislarga birinchi bo'limdagidan ko'ra, yaxshiroq o'yin ko'rsatib bera oldi. Mark Vilmots jamoasi ikkinchi bo'limda o'z "siri"ni ochishga majbur bo'ldi.

Belgiya jamoasining keyingi raqibi Rossiya terma jamoasi bo'ladi. Bu uchrashuv ham ko'pchilikka katta qiziqish uyg'otayotganligi aniq. Demak kutamiz!

JCH-2014. “H” guruhi. 1-tur
21:00. BELGIYA – JAZOIR 2:1
17 iyun. 21:00
Bosh hakam: Marko Rodrigez (Meksika)
Yordamchi hakamlar: Marvin Torrentera (Meksika), Markos Kintero (Meksika)
Zaxira hakami: Alirizo Fag'oni (Eron)

Gollar: Feguli, 25 penalti - 0:1. Fellayni, 70 - 1:1. Mertens, 78 - 2:1.

Belgiya: 1.Tibo Kurtua, 2.Tomas Alderveyreld, 4.Vensan Kompani, 5.Yan Vertongen, 6.Aksel Vitsel, 7.Kevin De Bruyne, 9.Romelu Lukaku (17.Divok Origi, 58), 10.EdenAzar, 15.Daniel van Buyten, 19.Mussa Dembele (8.Maruan Fellayni, 65), 22.Nosir CHadli (14.Dris Mertens, 46).

Jazoir: 23.Rais Mboli, 2.Majid Bugerra, 3.Fauzi G'ulom, 5.Rafiq Xalliche, 10.Sofyan Feguli, 12.Karl Mejani (9.Nabil Gilas, 84), 14.Nabil Bentaleb, 15.El Arabi Sudani (13.Islam Slimani, 65), 19.Safir Tayder, 21.Riyad Mahrez (8.Mehdi Lasen, 72), 22.Mehdi Mustafo.

Ogohlantirishlar: Yan Vertongen (24),  Nabil Bentaleb (33).

SHahboz Beg'amov