Bahodir Mirzaev O'zbekistonda futbolni boshqarishni takomillashtirish mavzusida dissertaciya yoqladi

Jismoniy tarbiya va sport menejmenti yo'nalishida yozilgan dissertaciyaning mavzusi to'liq tarzda "O'zbekistonda professional futbolni rivojlantirishda boshqaruv mexanizmini takomillashtirish" deb nomlanadi.

Bahodir Mirzaevga mazkur ishda O'zbekiston davlat jismoniy tarbiya va sport universitetining rektori, iqtisod fanlari doktori, professor Boltaboev Mahmudjon Rustamovich ilmiy rahbarliq qildi.

Ushbu dissertaciyada qator dolzarb masalalar ko'tarilgan bo'lib, yurtimizda professional futbolni rivojlantirishda zamonaviy boshqaruv strategiyalarini ishlab chiqish va samarali boshqaruv mexanizmini amaliyotda qo'llash bo'yicha bir qancha ilmiy tavsiyalar berilgan.

AGMK bosh direktorining dissertaciyasida futbolning boshqaruv mexanizmini takomillashtirish bo'yicha G'arbiy Evropadagi futboli eng rivojlangan mamlakatlarning tajribasi o'rganilgan. Boshqaruv mexanizmini tashkil etishda Belgiya tajribasi eng samaralilardan biri bo'lganligi sababli, uni o'rganishga katta ahamiyat berilgan. 

2000-yillar boshida gigant terma jamoalardan orqada qolib ketgan Belgiyada, bolalar-o'smirlar futbolidagi tizimni tubdan yangilash orqali 14-15 yilda mamlakat milliy terma jamoasini dunyo etakchilari safiga FIFA reytingidagi 66-o'rindan so'nggi yillardagi muntazam 1-2-o'rinlarga olib chiqish vazifasi qanday uslub va usullar yordamida uddalangani, boshqaruvda qanday taktika va strategiyalar qo'llanilgani ilmiy ishdagi eng etiborli jihatlardir (misol uchun, FIFAning so'nggi elon qilingan reytingida O'zbekiston hozir 77-o'rinda).

Bahodir Mirzaevni futbol sohasidagi mazkur ilmiy muvaffaqiyati bilan tabriklaymiz!