Azizbek To'xtaboev: "Neftchi"ning g'alabasini tasodif demagan bo'lardim"

Bu kabi musobaqalarning o'tkazilishi davlatlar o'rtasida do'stona munosabat va xamkorlik aloqalarining yanada kuchayishiga olib keladi. Ilgari bu kabi xorijlik jamoalar bilan o'rtoqlik o'yinlarini tashkil etishda qiyinchiliklarga duch kelardik. Hozirgi kunda bu boradagi muammolar hal bo'ldi, mana yaqinda Qo'qonda “Xo'jand” jamoasiga qarshi o'rtoqlik o'yinini o'tkazdik,shuningdek “Bunyodkor” futbol klubi ham xorijda o'rtoqlik o'yini o'tkazib keldi. Qancha shu kabi o'yinlar ko'p o'tkazilsa, jamoalarning xalqaro tajribasi ortadi.

O'zbekistonlik futbolchilarning ko'pchiligi bir-birini biladi, imkoniyatlarni chamalay oladi. Xorij jamoasiga qarshi o'ynaganda esa mutlaqo yangi raqibga, notanish jamoaga duch keladi. Yana bir bor aytaman, bu kabi musobaqalar futbol jamoalariga katta tajriba maktabi bo'ladi.

Oldimizda O'zbekiston liga kubogi musobaqasi doirasida “Paxtakor”ga qarshi jiddiy uchrashuv kutib turibdi. SHundan kelib chiqib kechagi va bugungi o'yinlarda tanlashda qiyinchiliklarga duch keldik. Asosan yoshlardan iborat futbolchilarni maydonga tushirdik. Bugungi raqibimiz ham yosh jamoa ekan, ko'rib turganingizdek, 6:0 hisobida g'alaba qozondik.

Kechagi “Neftchi”ga qarshi o'yin haqida aytadigan bo'lsam, o'zim ham yoshligimdan “Neftchi”ga muxlislik qilib kelaman. “Neftchi”dan uchragan mag'lubiyatimizni tasodif demagan bo'lardim, ularning g'alabasiga nisbatan “sencasiya” yoki “tasodif” degan so'zlarni ishlatish noto'g'ri bo'ladi. Yuqorida aytganimdek, bizni oldinda “Paxtakor”ga qarshi o'yin kutib turganligi bois, bu musobaqada asosan zahira vakillari va yosh futbolchilarni maydonga tushirdik. “Neftchi”ning hozirgi tarkibi ham chakki emas, o'yinda ikkinchi bo'lim so'ngiga qadar hisob 0:0 bo'lib turgandi. Uchrashuv so'ngida yuzaga kelgan birgina xato tufayli gol o'tkazib yubordik. Bu o'yinda har ikki jamoa ham g'alaba uchun harakat qildi, yakunda “Neftchi”ga omad kulib boqdi - deydi Azizbek To'xtaboev.

Bekzod Tolibov yozib oldi.