Muhammadali Usmonov: "Andijon" muxlislarining bunday iliq kutib olishi boshqacha quvonch va xursandchilik bag'ishladi"

"Burgutlar" azosiga aylangan yangi o'yinchilar orasida hujumkor yarim himoyachi Muhammadali Usmonov ham bor. "Paxtakor"da to'p tepgan asli andijonlik yigit o'z uyiga qaytdi va endi "Andijon" sharafini himoya qiladi. Usmonov "Andijon" matbuot xizmatiga intervyu berar ekan, bir qator savollarga javob qaytardi.

- Muhammadali, ikkinchi davradan faoliyatingizda yangi sahifa ochilmoqda. Bunday yangi chaqiruvga qanchalik tayyor edingiz?

- Barcha andijonliklarga, futbol muxlislariga, "Ultras Burgut" azolari, hamma-hammaga assalomu alaykum. Nasib qilsa, ikkinchi davradan faoliyatimda yangi sahifa ochiladi. "Andijon" klubiga, murabbiylar shtabiga chaqirib, ishonch bildirgani uchun katta rahmat. Albatta, chaqiruvga tayyor edim, chunki o'zingiz bilganingizdek, o'yin amaliyotisiz qolgandim. Shu sababli ketishim kerak edi. Ketishimni oldindan bilardim. Men o'ynashni istayotgandim. Xudo xohlasa, "Andijon"da ko'proq o'yin amaliyotiga ega bo'lib, o'zimni ko'rsatib, sog'lom raqobat qilishga harakat qilaman.

- "Andijon" bilan Tojikiston yig'inida qatnashdingiz. Qanday taassurotlar qoldi?

- Albatta, jamoa bilan Tojikistondagi yig'inda bo'ldim. Kuniga ikki mahaldan mashg'ulotlar o'tkazdik. Jamoadoshlarimga rahmat, hammasi iliq kutib olib, yaxshi qabul qilishdi. Hamma bilan juda yaxshi chiqishib ketdim. 

- Yangi jamoada 99-raqamni tanladingiz. Bu sizning yoqtirgan raqamingizmi?

- Raqam masalasiga keladigan bo'lsak, yoqtirgan raqamlarim ichida bu ham bor. Shuning uchun 99 ni tanladim. Avvalo, raqam o'yinchini emas, o'yinchi raqamni bezab turadi. Xudo xohlasa, yaxshi o'yinlar ko'rsatsak, 99-raqam yanada chiroyli bo'lib ko'rinadi.

- Muxlislar sizni xursandchilik bilan qarshi oldilar va hamma yangi o'yinchilar qatori sizdan ham umidlari katta. Ularning qo'llab-quvvatlashi sizga qo'shimcha motivaciya bag'ishlayaptimi?

- Muxlislarning bunday iliq kutib olishi o'zim uchun ham boshqacha quvonch va xursandchilik bag'ishladi, chunki har bir futbolchining orzusi muxlislarning qalbidan joy olish. Menga ishonch bildirishyapti va Xudo xohlasa, bu ishonch albatta oqlanadi.

- Ikkinchi davrada oldingizga qo'ygan vazifangiz qanday?

- Ikkinchi davrada oldimga qo'ygan vazifam – chiroyli o'yinlar va gollarim bilan muxlislarni xursand qilib, jamoamga yordam berish. Osiyo Chempionlar Ligasi 2da ham ijobiy natijalarga erishish vazifamiz hisoblanadi. 

- O'z uyingizga qaytdingiz va qachondir shu holat yuz berishi kerak edi. "Paxtakor"dan "Andijon"ga o'tishingizni qanday izohlagan bo'lardingiz?

- Men uyimga qaytdim. Inson o'z uyida qanchalik erkin bo'lishini bilasiz. Nasib qilsa, bunday erkinlik bilan yanada kuchliroq bo'lib, biz barchasini albatta uddalaymiz. Muxlislarimizga rahmat. Bizni qo'llab-quvvatlab turishsa, albatta vazifani bajaramiz. Olg'a, "Andijon"!