Anvar Berdiev aprel oyida Andijonning Eng yaxshi futbolchisi bo'ldi

Kuni-kecha poyoniga etgan aprel oyi bo'yicha telegramdagi rasmiy kanalimiz orqali muxlislar o'rtasida Andijonning  Eng yaxshi futbolchisini aniqlash borasida so'rovnoma o'tkazdik. Unda tajribali hujumchi Anvar Berdiev eng ko'p ovoz to'plab, birinchi bo'ldi. Keyingi o'rinni jamoa sardori Ibrohim Otaxonov egallagan bo'lsa, uchlikni Farhod Bekmuratov yakunlab berdi. 

Darhaqiqat, aprel oyi Berdiev uchun ijobiy o'tdi deyish mumkin. Ayniqsa o'z maydonimizdagi uchrashuvlarda bir nechta gollar urib, jamoa g'alabalariga o'z hissasini qo'shishga erishdi. 

Birgina Cementchi bilan bahsda yuz bergan xolatni (chetlatishni) inobatga olmasak aprel oyi Berdiev uchun yomon o'tmadi deya olamiz. 

Umuman olganda yakuniga etgan oyda barcha futbolchilarimiz jamoa manfaatlari yo'lida astoydil ter to'kdi. Umid qilamizki, bu xolat mavsum so'nggiga qadar davom etadi.