AGMK jamoasining Superliga-2019dagi statistikasi
07 dek 2019 15:49
Yangiliklar

AGMK jamoasining Superliga-2019dagi statistikasi

Mavsum yakunlariga bag'ishlangan statistik malumotlar bilan tanishtirib o'tamiz. Dastlab AGMK jamoasi safida joriy mavsum Superligada maydonga tushgan futbolchilarga etibor qaratamiz.

Mavsum davomida Mirjalol Qosimov jamoamizning ko'plab futbolchilari qatorida ko'plab iqtidorli yoshlarga ham imkoniyat yaratdi. Superligadagi 26 o'yinda jamoamiz murabbiylar shtabi jami 31 futbolchi xizmatidan foydalandi.

Dilshod Jo'raev joriy mavsum Superligada jamoamiz tarkibida eng ko'p o'yin o'tkazdi. Jo'raev faqatgina birgina bahsda maydonga tushmadi. Eng ko'p o'yin o'tkazish bo'yicha ikkinchi pog'onani Saydullo Rahmatov egalladi. Rahmatov hisobida 22 o'yin mavjud. Joriy mavsum AGMK tarkibida Jasur Umarov, SHahboz Umarov, Kamron Saydazimov, Nizomiddin Ziyovutdinov, Rasul Yo'ldoshev hamda Farhod Imomov kabi yoshlar ilk marotaba katta futbol havosidan Superligada nafas olishdi.

AGMK Superligada eng ko'p gol urish bo'yicha to'rtinchi ko'rsatkichni qayd etdi. Jamoamiz faqatgina turnir jadvalida yuqori uchlikdan ko'ra kamrok gol kiritdi xolos. Urilgan 36ta golga 12 nafar futbolchilar mualliflik qilishdi. Eng ko'p gol tabiiyki jamoamizning asosiy forvardi Zafar Polvonov (15) hisobiga yozildi.

AGMK o'tkazilgan 26 o'yindan 9tasida g'alaba qozondi. Bu mavsumdagi 34,6% o'yinlar g'alaba bilan yakunlanganidan dalolat. SHuningdek 5 o'yin durang bilan, yani 19,2% uchrashuvlarda murosaga kelindi. 12 bahsda (46,2%) esa mag'lubiyat qayd etilgan. Jamoamiz ishtirokidagi 26 uchrashuvda jami 73 gol kiritildi. Har bir o'yinda o'rtacha 1,38dan gol urilgan bo'lsa, 1,42tadan to'p o'tkazib yuborilgan.

AGMK asosan ikkinchi bo'limda ko'proq gol urgan. Kiritilgan gollarning 16tasi (44%) birinchi taymda, 20tasi (56%) esa tanaffusdan so'ng urilgan. O'tkazib yuborilgan gollar esa aksincha, yani birinchi bo'limda nisbatan ko'proqni tashkil qiladi. Birinchi taymda 51%, yani 19ta, ikkinchi taymda esa 49%, yani 18ta.

AGMK jamoasi Superliga-2019 mavsumini 8-o'rinda yakunladi. Bu o'tgan yilgi chempionat bilan solishtirganda, 2 pog'onaga ko'tarilishni anglatadi. SHuningdek, o'tgan mavsumda 12 jamoa ichidan o'ninchi bo'lgan jamoamiz, bu gal 14 jamoa ishtirok etgan Superligada sakkizinchi bo'ldi.

SHu orada AGMK jamoasining barcha mavsumlardagi ishtirokini qisqacha eslab o'tamiz:

2008 yilgi mavsum — 10-o'rin

2009 yilgi mavsum — 4-o'rin

2010 yilgi mavsum — 11-o'rin

2011 yilgi mavsum — 10-o'rin

2012 yilgi mavsum — 8-o'rin

2013 yilgi mavsum — 5-o'rin

2014 yilgi mavsum — 6-o'rin

2015 yilgi mavsum — 6-o'rin

2016 yilgi mavsum — 13-o'rin

2017 yilgi mavsum — 7-o'rin

2018 yilgi mavsum — 10-o'rin

2019 yilgi mavsum — 8-o'rin

AGMK O'zbekiston chempionatidagi 12-mavsumini o'tkazdi. Jamoamizning elitadagi o'yinlar soni 339taga etdi. O'tkazilgan o'yinlarning 119tasida g'alaba qozonilgan bo'lsa, 70 durang qayd etilgan va 150 uchrashuvda imkoniyat boy berilgan. To'plar nisbati: 465-501.

O'zbekiston chempionatlari tarixida AGMK ayni paytda 41 jamoa orasidan 18-o'rinda turibdi. Umumiy hisobda to'plangan ochkolar soni 427ni tashkil qilmoqda va 17-pog'onadagi "Surxon"dan atigi 1 ochkoga kam.