Эксперт фикри. Санжар Асқаралиев: "Навбаҳор" Виктор Жалиловни мавсум бошида тайинлаши ёки Нўъмон Ҳасановга вақт бериши керак эди

Янги мавсумга жамоани тайёрлаган Нўъмон Ҳасанов истеъфога чиқарилди ва унинг ўрнига Виктор Жалилов бош мураббий этиб тайинланди. Биринчи турдан кейиноқ мураббийнинг ишдан олиниши кўпчилик қатори бизни ҳам таажжубга солди. Ушбу ҳолатга нима сабаб бўлгани аниқ эмас. Биз эса вазиятга баҳо бериш мақсадида эксперт фикрига юзландик. Бунда ўз вақтида "Навбаҳор", "Нефтчи"даги ўйинлари билан танилган собиқ футболчи Санжар Асқаралиев мазкур жараёнларга ўз муносабатини билдириб ўтди. 

"Биринчи турданоқ мураббий ўзгариши чемпионатимизда кам кузатиладиган ҳолат ҳисобланади, бунақаси деярли юз бермайди. Шахсий фикримча, мураббий ўзгаришини мавсум олдидан амалга ошириш ёки Нўъмон Ҳасановга бироз вақт бериш керак эди. 

Виктор Жалиловни олдинда қийин ишлар кутмоқда. Биринчидан, жамоани Виктор Романович шакллантирмаган, футболчиларни у киши танламаган. Шу боис бирданига катта ўзгаришларга қўл ура олмайди. Иккинчидан, мураббий бор футболчилар билан олдиндаги ўйинларга тайёргарлик кўришга мажбур. Бу натижа берадими-йўқми буни вақт кўрсатади. Эшитишимга қараганда, сербиялик футболчилар ҳам жамоани тарк этиш арафасида. Ушбу мутахассисдан кўп нарса ўрганиш мумкин. Яна қайтараман, олдиндаги баҳсларда катта ўзгаришлар бўлмайди. 

Виктор Романович биринчи даврани қўл остидаги футболчилар билан ўтказиб, ёзги трансферлар ойнаси вақтида ўзи истаган ўйинчиларни жалб қилиши мумкин. Мураббийлик постини мавсум аввалида ёки жорий мавсум якунлангач бериш керак эди, деб ўйлайман. 

Кўпчилик катта натижалар, ўша чемпионликни кутаётгани табиий. Тўғри, ҳозирги футбол умуман бошқача. Лекин мураббий шу футболни ичида юрди, четга чиқиб кетгани йўқ. Вақт ўтгани сари барибир жамоада ўзгаришлар қилади", - дейди Санжар Асқаралиев.