Coca Cola Суперлигаси. Олтинчи турнинг энг яхшилари

Тур дарвозабони - Зафар Сафаев ("Бухоро")

"Бухоро" клуби мавсумни учта мағлубият билан бошлаганди. Карантин бошланишидан аввал клуб легионерлари ўз юртларига жўнаб кетишганди. Бош мураббий Муҳсин Муҳаммадиев ҳам Россиядан қайтиб келиб, 14 кунлик карантиндан кейин фақат 6-турда жамоани ўйинга бошлаб туша олди. "Бухоро" Қаршида "Насаф"га етарли қаршилик кўрсата олди. "Аждарлар" ўйин давомида жуда кўплаб зарба беришди, бу зарбалар йўлига бухороликлар посбони Зафар Сафаев тўғаноқ бўлди ва "Бухоро" бу мавсум сафардаги илк очкосини қўлга киритди. Сафаев иккинчи бор тур дарвозабони сифатида эътироф этилди.

Тур голи - Фарҳод Бекмуротов ("Андижон")

Кўпчилик бу турда "Андижон" Жиззахда мағлубиятга учраб қайтишини тахмин қилгани бор гап. Сабаби "Сўғдиёна" рестартдан кейин "Пахтакор" ва "Локомотив"ни мағлуб этганди. Шу боис Бақоев жамоаси бу ўйинда сўзсиз фаворит эди. Барчаси "Сўғдиёна"нинг ғалабаси билан тугашига ҳеч ким монеълик қила олмайдигандек эди. Бироқ 90-дақиқада "бургутлар" сардори Фарҳод Бекмуротовнинг чамаси 25 метрлардан йўллаган кучли зарбаси суперголга айланди. Ушбу голни тур голи деб эътироф этдик. Бу турда Селим Нурмурадов ("Бунёдкор"), Суҳроб Бердиев ("Қўқон-1912") ва Азизбек Турғунбоев ("Навбаҳор") каби футболчилар ҳам чиройли голлар уришганини таъкидлаш лозим.

Тур футболчиси - Азизбек Турғунбоев ("Навбаҳор")

Наманганнинг "Навбаҳор" клуби 6-турда Бекободда "Металлург"ни мағлубиятга учратди. Шипилов бошчилигидаги жамоа рестартни иккита кетма-кет ғалаба билан бошлаганди. "Лочинлар" "Металлург"нинг мана шу юришига чек қўйишди. Бунда жамоа етакчиси Азизбек Турғунбоевнинг ҳиссаси катта бўлди. Футболчи биринчи таймнинг ўзида икки бор Александр Лобанов қўриқлаётган дарвозани ишғол қилиб дубль муаллифига айланди. Турғунбоев 2017 йилдан буён илк бор Ўзбекистон чемпионатида дубль қайд этди.

Тур мураббийи - Андрей Канчельскис ("Навбаҳор")

Юқорида айтганимиздек "Навбаҳор" бу турда Бекободда "Металлург"ни мағлуб этиб қайтди. Жорий мавсум "лочинлар" сафарда умуман ғалаба қозона олишмаган эди. Андрей Канчельскис бошчилигидаги жамоа "Металлург"ни Бекободда мағлуб эта олди. Россиялик мураббий сайтимиз томонидан ҳақли равишда тур мураббийи деб тан олинди.