Россия спорт вазири мамлакат футбол чемпионатини терма жамоага ёрдам беришни хоҳламасликда айблади
28 jan 2014 16:09
News
![](https://championat.asia/upload/storage/115876_original.jpg)
![](/upload/storage/115876_220.jpg)
Россия спорт вазири мамлакат футбол чемпионатини терма жамоага ёрдам беришни хоҳламасликда айблади
Бу ҳақда «Р-Спорт» хабар бермоқда.
Хабар беришларича, мамлакат чемпионатининг сўнгги турини нисбатан эрта муддатга суриш ҳақида футбол бўйича Россия миллий терма жамоаси бош мураббийи, италиялик Фабио Капелло, терма жамоани ЖЧ-2014 баҳсларига нисбатан яхшироқ тайёрлаш мақсадида сўраган. Италиялик мураббий чемпионатнинг сўнгги турини 18 майдан 11 майга, мамлакат Кубоги финалини эса 8 майдан 17 майга кўчиришни сўраган. Бироқ 27 январь куни Премьер-лига ушбу илтимосни рад этди.
«Мен буни ақлга сиғмайдиган ҳолат деб ҳисоблайман. Мен клубларни ҳурмат қиламан, бироқ мамлакат жаҳон чемпионатида иштирок этади. Унга тайёргарлик кўриш учун имкон бериш керак!», – деди Мутко сешанба куни. Вазирнинг сўзларига кўра, у Россия футбол иттифоқи президенти Николай Толстих ва Премьер-лига президенти Сергей Прядкин билан суҳбатлашган. Мутконинг фикрича, улар Капеллонинг илтимосини бажариш йўлини топишади.
28 январь куни Россия чемпионатининг сўнгги турини бошқа санага кўчириш масаласи Россия футбол иттифоқи ижроия қўмитаси мажлисида муҳокама қилинади.
Россия терма жамоаси 2002 йилдан бери биринчи марта футбол бўйича жаҳон чемпионати баҳсларида иштирок этади. Бразилияда бўлиб ўтадиган мусобақада руслар Жанубий Корея, Бельгия ва Жазоир жамоаларига қарши баҳс олиб боришади.
Қайд этиш жоиз, 24 январь куни Россия футбол иттифоқи мамлакат терма жамоасини ЖЧ-2014 финал босқичига олиб чиққан италиялик мураббий Фабио Капелло билан янги, 2018 йилги жаҳон чемпионати охиригача мўлжалланган шартнома имзолаган эди. Ушбу мундиал Россияда бўлиб ўтади.
![AMP Logo](https://championat.asia/image/logo-amp.png)
Comments