"Локомотив": Футболчиларимиз учун Англиядаги уч ойлик малака ошириш ўз якунига етди

Ушбу ҳамкорликнинг мақсадларидан бири ўзбекистонлик ёш футболчиларнинг Англияда малака оширишини ҳам таъминлаш кўзда тутилганди.

Натижада “Локомотив”нинг икки тарбияланувчиси – Рустам Нартажиев ва Сергей Прохоров туманли Альбионда уч ойлик ўқув-машғулот ўтказиш имконига эга бўлишди. Футболчиларимиз сентябрда Англияга йўл олганди, мана энди уч ойлик муддат ўз якунига етиб, дарвозабон ва ҳимоячимиз Тошкентга қайтиб келишяпти.

“Флитвуд Таун” мураббийи Бэрри Николсон қўл остида машғулотларда иштирок этган Нартажиев билан Прохоров “Флитвуд” сафида ўз дебютларини нишонлашга муваффақ бўлишди. Улар “Карлайл Юнайтед” билан кечган ўртоқлик ўйинида майдонга тушишди.
“Локо” дарвозабони Рустам Нартажиев Тошкентга қайтиш олдидан ўз фикрларини билдирди: “Биз уч ой машғулот ўтказиб, анча тажриба тўпладик. Менга Англиянинг об-ҳавоси ҳам, одамларнинг футболга бўлган муносабати ҳам ёқди. Айниқса, машғулотларни айтмайсизми. Бу ердаги машғулотлар анча оғир, қолаверса ўйинчилар ҳам тезкор ва бақувват. Кундан кунга ўзимни яхши ҳис этиб бордим. Энг муҳими эса инглиз тилини ўрганиб олганим бўлди. Ҳозир бу тилда эркин гаплаша оламан. Энди Тошкентга, ўз жамоам “Локомотив” футбол клуби сафига қайтаман. Кейинги фаолиятим қандай кечиши ҳақида бир нарса дейишим қийин, чунки ҳаммасини клубимиз раҳбарияти ҳал қилади. Агар яна Англияга келиш имконияти пайдо бўлса йўқ демасдим”.