Ғарбий Осиё чемпионати. Эрве Ренар Саудия Арабистони термаси бошқарувидаги дебютини омадсиз ўтказди

ЖЧ-2022 2 саралаш босқичидаги рақибимиз Саудия Арабистони терма жамоаси Қувайтга қарши тўқнаш келиб, 1:2 ҳисобида мағлубиятга учради. Баҳсда ҳисобни саудияликлар ярим ҳимоячиси Раби Суфьяни очган бўлса, рақиблардан Ҳусайн ал-Мусави ҳамда Файсал Ажаб гол уришди. Қайд этиш жоизки, ушбу ўйин франциялик мутахассис Эрве Ренар учун саудияликлар бошқарувидаги дебют бўлди.

Гуруҳдаги иккинчи баҳсда эса Баҳрайн Исмоил Абдуллатифнинг голи эвазига Иордания устидан минимал ҳисобда зафар қучди. 

Энди «саҳро бургутлари» кейинги баҳсни 7 август куни баҳрайнликларга қарши ўтказади. Қувайт эса Иордания билан ўйнайди.

Маълумот ўрнида, айни дақиқаларда «А» гуруҳидан ўрин олган Сурия – Яман учрашуви бўлиб ўтмоқда.