Балки футболчи ношукр бўлгани яхшироқмиди...

Миллионлар ўйинидаги исталган етук футболчига мурожаат қилиб, у буюклик пиллапояларини қандай босиб ўтгани билан қизиқиб кўришингиз мумкин. Худонинг ўзи юқтирган деганимиз билан, Месси ҳам оғир меҳнатсиз бугунги даражасига ета олмасди. Биз профессионал деганда фақатгина катта футбол ўйнадиганларни тушуниб қолганмиз. Аслида муаммо шу нуқтадан бошланади.

Катта футболни мен ҳам ўйнай оламан. 20 дақиқа майдонда югуриб беришим мумкин, дейлик. Бироқ бу билан профессионал бўлиб қолмайман. Профессионал фақатгина машғулотларга чиқиб келадиган, ўйин куни кўринадиган футболчи эмас. Профессионал доим ўз устида ишлайдиган спортчидир. Бизда бу кабилар бармоқ билан санарли эканига ишонаман.

Тошкентдаги тунги клубларни, яхши бар ва пабларни ҳеч кўздан кечирганмисиз? Футболчиларнинг аксар қисми машғулотдан кейин шундай жойларга ошиқади. Албатта, худди биз каби бунга уларнинг ҳам ҳақи бор. Бироқ худди биз каби ҳаёт кечираётган бўлса, демак у профессионал эмас. Чекилаётган сигаретасидан тортиб, чилимига қадар, ичаётганларигача унинг физик ҳолатига ҳалал беради. Бироқ футболдан топаётган пули бу каби маконларда бемалол юриши учун етади.

Бу пайтда европалик футболчилар ўзидан ортиб, алоҳида физиотерапевт ёллайди. Ўйини бор-у, яхши туртки етишмаётганлари психолог қабулида бўлади ва ҳоказо. Витаминизация ҳақида айтамиз, ғарбда, Осиёнинг ривожланган мамлакатларида бу борада муаммо йўқ. Бизнинг клублар эса шу босқичга етиб ҳам келмаган, дейди баъзи футболчилар. Бироқ кимлар ўзи учун керакли воситаларни ўз чўнтагидан харид қилади? Нега мен сотиб олишим керак деб таъна қилса, бир нарса дейиш қийин. У тўғри гапни гапиряпти. Бироқ шу клубдан кейинги фаолияти-чи? Унинг қамровидан чиқиб кетиб, яхшироқ лигаларга йўл олиш учун тиним билмайдиганлар борми орамизда?

Шевченко “Милан”га ўтиш орзусида тинмай меҳнат қилган, Роналду энг зўри бўламаган деган, Месси бошқа нарсалар ҳақида ўйлаган. Уларнинг атрофида тўп сурадиган оддий йигитлар эса, ҳеч бўлмаганда шу кабилар тўхтата олиш учун ҳам меҳнат қилаверган. Улар стадионга мухлисларни ўз ўйини билан жалб этади, рекламадан даромад қилади, телетрансляциялар билан бойиш учун тиним билмайди. Биз-чи?

Биз борига шукр қиламиз, шундай ўргатишган. Шукр қилиш яхши. Қорнимиз тўқ, устимиз бут, одамлардан яхши яшаяпмиз. Бу каби фикрлар бизга ярашади, спортчига эмас. Чунки Месси 2—3 йил ишлаб топган пулига, умрининг охиригача яшай оларди. Аммо у тўхтаётгани йўқ. Бизнинг айрим футболчилар эса одамлардан яхши яшашяпти ва шунинг учун ҳам ўсишмаяпти. Мен мухлислар учун ўйнаётган спортчилар кўп эканлигига катта шубҳа билан қарайман. Шунинг учун ҳам клублар хусусий бўлмагунича олдинга қадам ташлашимиз қийин бўлаверади деб ҳисоблайман.