Абдумалик Ҳакимов: “Насаф-2”ни маҳорат эвазига мағлуб этдик”

Куни-кеча 8-тур баҳслари бўлиб ўтди. Қувасойнинг “Цементчи” жамоаси Қаршида “Насаф-2” меҳмони бўлиб, йирик 5:1 ҳисобида ғалабага эришди. Ўйиндан кейин “Цементчи” устози Абдумалик Ҳакимов билан боғланиб, мақсадимизни айтганимизда, мураббий бироз камтарлик қилиб, битта ғалабадан кейин тезда интервью берсак, қандоқ бўларкин дея кулиб қўйди. Шунга қарамай, аҳдимиздан қайтмасдан, Ҳакимовни суҳбатга кўндирдик. Ўйлаймизки, унинг фикрлари “Цементчи” мухлисларини қизиқтирмасдан қолмайди.

- Аввало жамоангизнинг йирик ҳисобдаги ғалабаси билан табриклаймиз. “Насаф-2”га қарши кечган баҳс ҳақида фикрларингизни билдириб ўтсангиз.
- “Насаф-2” яхши жамоа. У ерда асосан академия тарбияланувчилари ўйнамоқда. Курашчан клуб сифатида шаклланиб бораётганини эътироф этган бўлардим. Ростини айтганда, бизнинг футболчилар уларга нисбатан маҳорат бобида устунроқ. Учрашув давомида тажриба барибир ўз сўзини айтди.

- Йирик ҳисобдаги ғалабани айнан маҳорат эвазига қўлга киритдинглар. Шундайми?
- Ҳа. Биринчи бўлимда мезбонларда гол уриш учун имкониятлар бўлганди. Аммо кетма-кет биз гол ургач, устунлик жамоамиз томонига ўтди. Якунда мақсадимизга эришдик ва шу тариқа қимматли очкони қўлга киритдик. Албатта бу орқали ашаддий ишқибозларимизни хурсанд эта олганимиздан мамнунмиз.

- Голларнинг муаллифларига эътибор қаратсак, “Нефтчи” таркибидан келиб қўшилган футболчилар эканлигини кўрамиз...
- Тўғри, айтиб ўтдингиз. Нодирхон Камолов, Жаҳонгир Дадабоев ва Алишер Файзуллаев бунгача вилоятимизнинг бош жамоаси “Нефтчи”да эди. Уларнинг кўмаги сезиларли бўлмоқда. Шу кунгача тўплаган тажрибаси асқотмоқда. Аслида бу каби ўйинчиларни таркибга жалб этишдан мақсад ҳам янада кучайиш ва рақобатни ошириш эди. Умуман олганда, давралар оралиғида жамоамизга келиб қўшилган футболчиларнинг ёрдами катта бўлмоқда дейиш мумкин.

- Жамоа сардори Дилшод Эминовни сўнгги пайтларда майдонда кўрмаяпмиз. Бу нима билан боғлиқ?
- Биласизми 4-турда сафарда “Хоразм”га қарши кечган баҳс кескин ва қўполликларга бой тарзда ўтди. Мазкур учрашувни бошқариб борган ҳакамнинг ишини муҳокама қилмоқчи эмасману, лекин ўша Эминов жарохат олган пайтда рақиб футболчиси тўпга эмас, унинг тиззасига зарба берди. Натижада Дилшод оғир жарохат олди ва айни дамда даволаниш банд. Очиғи ўша вазиятда рақибга сариқ карточка ҳам кўрсатилмагани бизни ҳайрон қолдирди. Шахсан мен ўзим йигитларга ҳар бир учрашувдан олдин, тартибли ўйин намойиш этишини уқтириб бораман. Рақибга хурмат билан қараш кераклигини таъкидлайман. Тўғри, бу – футбол. Лекин очиқдан-очиқдан зарба бериш ҳам яхши эмас. Бизда ҳар бир сариқ ва қизил карточка учун моддий жарима жорий этилган. Ким учрашув чоғида карточка олса, кейин бутун жамоа олдида бунга жавоб беради ва керак бўлса, ойлик маошидан жаримага тортамиз.

- Натижа ижобий бўлиши учун тартиб-интизом ҳам асосий ўринга чиқиши керак дейишадику.
- Албатта. Интизом бор жойда, аҳиллик бўлади. Ишингизни унуми ўзини узоқ куттириб қўймайди. Шу боис “Цементчи”да ҳам энг аввало тартиб-интизомни биринчи ўринда туради. Агарда кимда-ким клубнинг қонун-қоидаларига амал қилмаса, у билан хайрлашишга мажбур бўламиз. Бу футболчи хоҳ етакчи бўлсин, тўпурар бўлсин барибир жамоани тарк этади. Бундайлар шу кунгача учради.

- “Цементчи” ўйин борасида рақибларига ютқазмаётган бўлсада, аммо айрим баҳсларда қимматли очколардан маҳрум бўлмоқда. Жамоага барқарорлик етишмаётгандек. Фикримизга қўшиласизми
- Биз бу йил энди янги жамоани тузиб, шакллантириб бормоқдамиз. Тайёргарликни январь ойидан бошлагандик. Мана орадан 9 ой вақт ўтди. Шу кунгача кўплаб футболчиларни синовдан ўтказдик ва талабга мос тушганларини имкон қадар олиб қолишга эришдик. Иккинчи давра арафасида ҳам таркибда жиддий ўзгаришларга қўл урдик. Курашчан жамоани яратиш учун маълум бир вақт кетади. Бир йилда кўзлаган мақсадга эришиш қийин. Яхши ҳамки жамоага келиб қўшилган янги футболчилар фарғоналик. Бу ҳам қайсидир маънода уларнинг жамоага мослашиб кетишида муҳим ўрин тутди. Шуни айтишни истардимки, биз кутган ўйин энди-энди чиқа бошламоқда ва натижа ҳам албатта бўлади.

Исломбек Рустамбеков суҳбатлашди.