Игорь Шквирин: "Бугун сўнгги уч ойдаги энг ёмон ўйинимизни кўрсатдик"

Матбуот анжуманинг иккинчи қисмида майдон эгалари бош мураббийи Игорь Шквирин иштирок этди.

"Бугун шогирдларим кўрсатган ўйиндан ҳалигача чиқиб кетганим йўқ. Рақибимиз жуда яхши ўйин кўрсатди. Агар шундай ўйнашда давом этса "Металлург" юқори ўринлар учун кураш олиб бориши мумкин. Биз эса аксинча жуда ёмон ўйин намойиш этдик. Сўнгги уч ойдаги энг ёмон баҳсни ўтказдик. Балки шогирдларим янги стадиондаги илк ўйин бўлгани учун ҳаяжонланишгандир, буни билиш учун бир-икки кун вақт керак.

Кеча машғулотлар ўтказиш учун бу ерга келганимиздаёқ футболчиларда ҳаяжон бор эди. Янги майдон, янги шароитлар... Бунга мослашиш керакдир балки.

Санжар Шоаҳмедов очиқчасига айтаман, ўтган йилги ўйиннинг ярмини ҳам кўрсатмаяпти. Бунга нима сабаб бўлаётганини билмайман. Полвонов эса ўтган йил жамоа тўпурари бўлиб осмонларда учиб юрибди. Хуллас ишлаш керак. 

Легионерларга келсак, Александр Алемпиевич ўзини кўрсатгани йўқ. Станоевич ўтган йилги савияда ўйнади, у ҳам жуда зўр ўйнамади. Дарвозабон Шомуродов эса қониқарли ҳаракат қилди.

Диёр Туропов икки йил олдин жуда ёш эди, уни термага чақиришди, Жаҳон чемпионатига борди, олимпия термасига чақирилди. Шундан сўнг ўзидан кетиб қолди. Бунда журналистларнинг ҳам кичик ҳам айби бор. Ёш ҳали ҳеч нимани қойил қилмаган футболчилар ҳақда кўп ёзаверманглар.  

Тунислик Шакер Зуаги кеча юртимизга етиб келди. Ҳозирча жамоа билан машғулот ҳам ўтказмади. Уни тиббий кўрикдан ўтказишда муаммо бўлмаса балки кейинги ўйинда майдонга тушар.

"Олмалиқ"нинг бу йилги мақсади ўтган йилгидан паст бўлмаган ўринни банд этиш. Клуб бюджети қанча эканлиги ҳақидаги саволни тўғридан-тўғри раҳбариятга берсанглар яхши бўларди.

 Хайрулла Холиқов ёзиб олди.