Хет-трик қайд этган легионер, рақибни тор-мор келтирган мураббий, финт билан гол урган футболчи — Суперлигада 22-турнинг энг яхшилари

Championat.asia сайти талқинига кўра, 22-турнинг энг яхши дарвозабони – Азизхон Исақов ("Қўқон-1912")

"Қўқон-1912" бу тур сафарда "Хоразм" билан беллашди. Шубҳасиз, қўқонликлар мағлубиятга учрамай, дурангни сақлаб қолишида дарвозабон Исақовнинг ўрни беқиёс. У яқин ва узоқ масофадан йўлланган бир қатор хавфли зарбаларни бартараф этди, бир қатор эпизодларда ишончли ҳаракатлари билан ажралиб турди. Шунингдек, жамоадошларини доим сергакликда ушлаб турди ва олдинга боришга ундади. Championat.asia ходимлари муҳокамалардан сўнг Азизхон Исақовни 22-турининг энг яхши дарвозабони деб топди.

Championat.asia сайти талқинида 22-турнинг энг яхши мураббийи – Александр Хомяков ("Бухоро")

Александр Хомяков бош мураббийлигидаги "Бухоро" ушбу турни ва ниҳоят ўз уйида – "Бухоро" футбол академияси майдонида ўтказди ҳамда "Навбаҳор"ни тор-мор келтирди. Хомяков жамоага янги келганига қарамай, шогирдларини ўйинга тўғри ва мукаммал тайёрлагани маълум бўлди. Ўша куни унинг барча ўйлаганлари ва таклик ишланмалари иш бериб, рақиб 5:0 ҳисобида таслим қилинди. Шу тариқа, "Бухоро" янги устози сўзсиз 22-турнинг энг яхши мураббийи дея эътироф этиди.  

Championat.asia сайти талқинига кўра, 22-турнинг энг яхши футболчиси – Доминик Бегич ("Бухоро")

Сал аввал айтганимиздек, "Бухоро" ортда қолган турда наманганликлар устидан 5:0 ҳисобида ғалабага эришди. Бу учрашув Босния ва Герцеговина вакили Доминик Бегичнинг бенифисига айланиб кетди. Легионер ҳужумчи 3 марта ўз номини таблога ёздириб қўйди ва Championat.asia ижодкорлари томонидан тур футболчиси номига лойиқ кўрилди.   

Championat.asia сайти талқинида 22-турнинг энг чиройли голи муаллифи – Хуршид Ғиёсов (ОКМК)

ОКМК бу тур Олмалиқда "Бунёдкор"ни қабул қилиб, 5:1 ҳисобида зафар қучди. Учрашувдаги ҳисобни очиб берувчи гол жуда чиройли чиқди. Сенаганинг ерлатиб берган пасидан сўнг марказда турган вингер Хуршид Ғиёсов маҳоратини кўрсатиб, ўзига хос финт орқали тўп киритди. Шундай қилиб, айнан шу гол Championat.asia талқинида турдаги энг чиройлиси деб топилди.