Виталий Левченко: “Ғалаба қозониш учун кучли хоҳиш керак”

Ўйин ҳақида

- Учрашувни яхши бошладик. Дастлабки қисмда юзага келган вазиятларимиздан унумли фойдаландик. Икки жамоа ҳам кучли иштиёқ билан ҳаракат қилди. Ғалабани қўлдан чиқариш аламли. Лекин бу футбол, ушбу спорт турида ҳамма нарса содир бўлиши мумкин. Хатолар кечирилмайди, қимматга тушади.

- Дарвозабонлар алмашинуви нима билан боғлиқ?

- Акбар Тўраев вазиятларни ҳис қилишда озроқ хатоликларга йўл қўйди. Шу боисдан ҳам захирадан Ботирали Эргашевни майдонга туширдик. 

- Терма жамоа футболчиси Азизбек Амонов захирада қолиб кетаяпти. Бунга қандай изох берасиз?

- Жисмоний жиҳатга кўп нарса боғлиқ. Бизда ҳужумчилар ўртасидаги рақобат кучли. Азизбек Амонов захирадан қўшилиб вазиятлар яратди, ўйинимизни кучайтирди. 

- Совринли ўринлар учун имконият бор деб ҳисоблайсизми?

- Албатта, чемпионат якунига қадар имконият бўлади. Ҳар бир ўйинда жиддий курашсак, натижаларга эришамиз. Майдонга 3 очкони кўзлаган ҳолда чиқишимиз керак. Ҳимояда кузатилаётган хатоларимиз бор, бу футболда натижаларнинг ижобий бўлмаслигига сабаб бўлади. Ғалаба қозониш учун кучли хоҳиш керак.

- Бугунги рақиб ҳақида фикрингиз?

- Яхши шаклланган жамоа. Натижа учун охиригача курашади. Масалан, ушбу мавсумдаги биз билан ўйинларда мағлубиятга учрамагани ҳам кўрсатиб турибди.