Виталий Левченко: "Биз учун ҳар бир ўйин олти очколи"

- Ўйин ҳақида фикрингиз?

- Жуда асабий ва қийин ўйин бўлди. Буни кўпчилик кўрди. Чемпионат охирида ҳамма бор кучини бериб ҳаракат қилмоқда. Осон рақибнинг ўзи қолмади, барча очко йиғишни ўйламоқда. Ҳозир вазият шундайки, ҳар бир ўйин биз учун олти очколи. Жамоамизни ғалаба билан табриклайман ва ишлашда давом этамиз.

- Суперлига тугашига 5та тур қолди. "Нефтчи"нинг чемпион бўлиш имкониятларини қандай баҳолайсиз?

- Курашишда давом этяпмиз. Кучли бешликда ким бўлса ҳамма курашяпти. Шунингдек, пастдагилар ҳам ҳаракат қилмоқда. Айтиб ўтганимдек, ҳар бир ўйин биз учун қийин бўлади. Чунки бизга қарши ҳамма жиддий ҳозирлик кўряпти. Менимча, кимда характер кучли бўлса, шу жамоа чемпион бўлади.

- Анвар Ғофуровнинг ҳолати қандай? Унинг жароҳати жиддий эмасми?

- Шифокорлар биринчи ёрдам кўрсатиб елкасига муз қўйишди. Энди эса аппаратга тушиши керак бўлади. Тиббий хулоса чиққач у ҳақда нимадир дея оламан.

- Бугунги ғалабани кимга бағишлаган бўлардингиз?

- Биринчи навбатда жамоамиз мухлисларига. Чунки "Нефтчи" ишқибозларига қойил қолмасдан илож йўқ. Улар ҳар бир ўйинда бизни қўллаб туришибди. Ўз навбатида биз ҳам ишқбозлар ишончини оқлашга ҳаракат қиляпмиз.

- "Нефтчи"нинг ғалабали ўйинларини буёғига Сиз ҳам мухлислар билан бирга нишонламасангиз бўлмайди.

- Мен ҳар доим ишқибозларни ҳурмат қиламан. Ушбу айтган гапингизни эса албатта инобатга олиб қўяман.

- Эшитишимизча, Сиз клуб билан шартномани яна 2 йилга узайтирар экансиз.

- Келинг, ҳозирча бу саволни очиқ қолдирамиз.