Виллаш-Боаш Бельгияни бошқаришдан бош тортди

Бельгия Футбол Федерацияси раҳбарияти Қатарда бўлиб ўтган Жаҳон чемпионатидан кейин терма устози Роберто Мартинесни лавозимидан озод этганидан сўнг Виллаш-Боаш билан боғланган. Португалиялик мутахассис эса бу таклифга рад жавобини берди. Шундан сўнг Бельгия Футбол Федерацияси ва мутахассис ўртасида ҳеч қандай алоқа бўлмади.

Олдинроқ ушбу ўринга Виллаш-Боашдан ташқари Германия терма жамоасининг собиқ бош мураббийи Йоахим Лёв ҳамда ПСЖ ва "Тоттенхэм"да ишлаган Маурисио Почеттинони кўриб чиқаётгани айтилган эди. Немис мутахассисининг агенти таклифни рад этди ва аргентиналик мураббийнинг Бельгия бошқарувига келиши эса даргумон.