Умарали Раҳмоналиев: "Навбаҳор" билан учрашувда "Бунёдкор"нинг нималарга қодирлигини кўрсатишга ҳаракат қиламиз"

Иван Бошкович бошчилигидаги "қалдирғочлар" ўз қароргоҳларида тайёргарликни давом эттиришмоқда. Кечаги машғулотларда барча футболчилар иштирок этди. "Навбаҳор"га қарши ўйинни Суҳроб Иззатов ва Давронжон Эргашев дисквалификация сабаб ўтказиб юборади. 

Олдиндаги баҳс ҳақида Умарали Раҳмоналиев ўз фикрлари билан ўртоқлашди. 

"Олдинда қийин ўйин кутмоқда. "Навбаҳор" чемпионлик учун курашаётган жамоа ҳисобланади. Шунга яраша тайёргарлик кўряпмиз. Бу учрашувда яхши натижа қайд этиб, мухлисларни хурсанд қилишга ҳаракат қиламиз. Боримизни берамиз, тамом. "Бунёдкор" нималарга қодирлигини кўрсатмоқчимиз. 

Сентябрь ойида терма жамоа билан кўп ўртоқлик учрашувларида майдонга тушдик. Уругвай, Аргентина билан кечган беллашувлар катта тажриба берди. Шунинг ҳисобига бўлса керак, Словакияга қарши баҳс ўйлаганимизданда енгилроқ кечди",- дейди Умарали Раҳмоналиев. 

Эслатиб ўтамиз, "Бунёдкор" - "Навбаҳор" учрашуви 1 октябрь куни 18:30да "Жар" стадионида бўлиб ўтади. Ўйинни Илгиз Танташев бошчилигидаги ҳакамлар жамоаси бошқариб боради.