Шуҳрат Муҳаммадиев: “Секейрага кўпроқ вақт бериш керак”

“Қўқондан очко билан қайтишни истагандик. Афсуски, ҳакамлар чиқарган баъзи тушунарсиз қарорлар режаларимизни бузиб ташлади. Ўйиндан кейин матбуот анжуманида бош мураббийимиз айтган фикрларга қўшиламан. Биз Қўқонга катта мақсадлар билан келгандик. Натижа учун охиригача курашдик. Ҳакам эса кутилмаган қарорлари билан ўйинни “бузиб” қўйди.

Бу билан ўзимизни оқламоқчи эмасман. Бироқ ҳакамнинг тушунарсиз қарорларии бизни руҳан “синдирди”. Охирги вақтларда матбуотда ҳакамлар мавзуси жуда кенг муҳокама қилинмоқда.

Мавсум бошида “Локомотив” совринли ўринлар учун курашга қўшилганди. Бугунги мағлубиятдан кейин 3-ўрин учун имкониятларимиз жуда камайиб кетди. Бироқ биз профессионалмиз ва охиригача курашамиз. Навбатдаги учрашувларда ижобий натижа қайд этиш учун майдонга тушамиз.

Секейра ҳақида нималарни айтишим мумкин? У ажойиб мутахассис. Европача футболни жамоамизга олиб кирди. Унга кўпроқ вақт бериш керак. Бундай даражадаги мутахассисларни таклиф қилиш бизнинг футболимизга фойдали”, - дея сўзини якунлади Муҳаммадиев.