Шуҳрат Асланов: "Насаф фарм"нинг Про лигадаги иштироки клубнинг йиллик харажатлари учун юкламани оширади. Шу сабабли жамоа Про лига мусобақасида иштирок этмайди"

Бу ҳолат юртимиздаги ОАВда  ёритилди. Мухлислар эса бу хабарни турлича қабул қилишди. Клуб президенти Шуҳрат Асланов ушбу ҳолат бўйича фикрларини билдириб ўтди.

- "Насаф фарм" жамоаси бу йил 1-лига мусобақаларида чемпионликни қўлга киритди. Чемпионлик футболчилар ва мураббийлар қатори бизни ҳам хурсанд қилди, албатта. Мусобақа ғолиблиги эса кейинги мавсумда Про лигада иштирок этиш имкониятини беради. Про лига мусобақасида эса асосан Суперлигага чиқишни мақсад қилган жамоалар иштирок этиши барчага маълум.

Фарм жамоамизнинг Про лига беллашувларида иштирок этмаслиги ҳақидаги хабар футболчилар ва уларнинг ота-оналарининг дилини бироз хира қилгани аниқ. Лекин масаланинг иккинчи тарафи ҳам бор. "Насаф" футбол клубида яхши тизим йўлга қўйилган. Клуб қошида футбол мактаби фаолият юритади. Мактабнинг U-19 ва U-21 ёшдаги тарбияланувчилари ҳам ЎзПФЛ мусобақаларида иштирок этади. Ўз-ўзидан U-19 ва U-21 жамоаларида ёш чегараси сабаб ўйин амалиётисиз қолиб кетаётган умидли футболчилар учун биз айнан "Насаф фарм" жамоасини ташкил қилган эдик. Биз ўзимизнинг мактабдан чиққан йигитларга мана учинчи йилдирки, имкон бериб келмоқдамиз. Бу жамоамизнинг асосий вазифаси бош жамоага яхши футболчиларни етказиб бериш эди. Бош жамоанинг қишки йиғинларида ҳам фарм жамоасидан футболчиларни кўрикдан ўтказиш мақсад қилинган.

Фарм жамоасининг Про лигадаги иштироки клубнинг йиллик харажатлари учун юкламани оширади. Шу сабабли жамоа Про лига мусобақасида иштирок этмайди ва 2025 йилда ҳам 1-Лига мусобақасида қатнашиши таъминланади. "Насаф"нинг ривожланиш стратегиясига кўра, бу маблағлар футбол мактабининг барча жамоалари, U-19, U-21 ва "Насаф фарм" жамоаларининг кейинги йилдаги мусобақаларда сифатли иштироки учун сарфланади.