⚡️ Шомуродов топ-100'да! У Адебайор ва Мхитарян билан тенглашди

Биринчи таймда Элдор Шомуродов Одил Ҳамробековнинг узатмасидан кейин рақиб дарвозасини ишғол этишга эришди. “Рома” форварди терма жамоадаги 59-ўйинида 32-голни уриб, тўпурарлар рўйхатида Александр Гейнрих ҳамда Миржалол Қосимовни (31 тадан) ортда қолдирди. Ундан олдинда эса фақатгина Максим Шацких (34 та) бор.

Шунингдек, Элдор терма жамоа миқёсида энг кўп гол урганлар рўйхатида 94-99 ўриндаги футболчилар билан тенглашди. Аввалроқ, миллий жамоа либосида 32 та гол уриш Шандел Самуэль (Сент-Винсент ва Гренадини), Михалис Константину (Кипр), Эммануэль Адебайор (Того), Генрих Мхитарян (Арманистон) ҳамда Роке Санта Крус (Парагвай)га насиб этганди.

Шацких эса Комминз Менапи (Соломон ороллари), Мумуни Дагано (Буркина-Фасо) ва Садио Мане (Сенегал) билан бирга 89-92-ўринларда турибди.

Эслатиб ўтамиз, терма жамоа миқёсида гол уриш бўйича мутлақ рекорд португалиялик Криштиану Роналдуга тегишли – 117 та.