Шерзод Қосимовдан бошқа ҳакам йўқми?

Қизиғи шундаки, худди 1-даврада "Бунёдкор" стадионида бўлгани каби "Пахтакор" ўйингоҳида кечадиган беллашувни ҳам Шерзод Қосимов бошқариб боради.

Эсингизда бўлса, биринчи даврада бўлиб ўтган баҳсда "Бунёдкор" 1:0 ҳисобида зафар қучганди. Бугун нима бўлишини эса ўйиндан кейин билиб оламиз. Ўйлаймизки, бугунги баҳс ҳам шиддатли ва шунга яраша қизиқ кечади.

Лекин шу ўринда бизни ҳайрон қолдирган жиҳат, Ҳакамлар қўмитаси томонидан бу учрашувга яна Шерзод Қосимовнинг тайинланганидир. Бу ерда яна деб биринчи даврадаги ўйинни ёдга олаётганимиз йўқ. Гап шундаки, Шерзод Қосимов "Пахтакор"нинг ўз майдонидаги кетма-кет учинчи ўйинида ҳакамлик қилади.

Умуман олганда, бу баҳс Шерзод Қосимов учун Суперлигадаги 7-ўйин бўлади. Қизиғи, Қосимов охирги икки бор "Пахтакор"нинг ўз майдонидаги баҳсни бошқарган. "Пахтакор" бу ўйинларда бир ғалаба ва бир дуранг қайд этган.

Шерзод Қорсимов Суперлигада бошқарган ўйинлар:
2-тур. "Бунёдкор" - "Пахтакор" 1:0
4-тур. "Насаф" - "Металлург" 1:1
6-тур. АГМК - "Қўқон-1912" 0:0
7-тур. "Қизилқум" - "Нефтчи" 1:0
8-тур. "Пахтакор" - "Навбаҳор" 1:0
10-тур. "Пахтакор" - "Қўқон-1912" 1:1
13-тур. "Пахтакор" - "Бунёдкор"

Албатта, битта ҳакамнинг бир жамоа уй ўйинларига кетма-кет уч марта қўйилиши ғалати. Балки бунақаси футболимиз тарихида биринчи марта рўй бераётган бўлиши ҳам мумкин.

Бу ўринда Шерзод Қосимовнинг айби йўқ. Чунки у ўзини ўзи ўйинларга тайинламайди. Ҳамма гап Ҳакамлар қўмитасига бориб тақаляпти. Бизга маълумки, Ҳакамлар қўмитаси тур учрашувларига ҳакамларни тайинлаётганида ҳар бир деталга эътибор қаратади. Аммо қаторасига уч марта Қосимовни "Пахтакор" уй ўйинига қўйилиши ғалати. Ёки мамлакатимизда дербини бошқара оладиган бошқа ҳакам йўқми?