Санжар Қувватов: "Узоқдан гол ўтказиб юборган ўйинимда тўп енгил, майдон эса пляж футболиники каби эди. Яхши ўйин бўлиши учун яхши майдон керак"

- Бугунги ўйин қандай ўтди деб ўйлайсиз?

- Бугун яхши ўйин бўлди. Натижа, албатта, қониқтирмади, сабаби майдонда бир киши кўп бўлиб қолишимизга қарамай, устунликдан фойдалана олмадик. Лекин жамоадошларимга миннатдорчилик билдираман, чунки улар ўйин сўнгига қадар курашишди. Кейинги ўйинларда ғалаба учун ҳаракат қиламиз.

- "Қизилқум" ўйин якунига 15-20 дақиқа қадар вақт қолганда бир киши кўп бўлиб қолганига қарамай, ҳимоявий ўйинни давом эттирди. Жамоа Тошкентга дурангни мақсад қилиб келгандек таассурот қолдирди.

- Йўқ, биз ғалаба учун келгандик. Тактикамиз қарши ҳужумдан иборат эди. Биз мураббийлар кўрсатмаларига асосан ҳаракат қилдик. Ҳимояга тўлиқ ётиб олганимиз йўқ, ҳужумлар ташкил қилдик. Қисқа айтганда, ўз тактимиздан четга чиқмаган ҳолда қарши ҳужумларда ўз омадимизни синаб кўрдик.

- Сизни пенальтиларни қайтаришда моҳир эканлигингизни биламиз. Бироқ сўнгги ўйинларда узоқ масофадан гол ўтказиб юборганингизга гувоҳ бўлдик. Дарвозабон учун қай бири ноқулай: узоқ масофадан кучли зарба ёки яқин масофадан йўлланган зарба?

- Узоқ масофадан ўтказиб юборилган голни изоҳласам, ўша тўп меъёридан анча енгил вазндаги тўп эди, бундай тўпда йўлланган зарбани қайтариш эса барча дарвозабон учун қийинчилик туғдиради. Қолаверса, майдоннинг ёмонлиги таъсир ўтказди. Бир кун аввал машғулотлардаёқ жаҳлим чиқишни бошлади. Чунки дарвозабон учун бундай майдон пляж майдонида футбол ўйнаганга ўхшайди. Ўша ўйинда ("Бухоро"га қарши ўйин назарда тутилмоқда. Ўйин "Жар" стадионида ўтказилган – таҳририят) икки оёғим қумга кириб қолгани учун сакрай олмадим. Тўп сакраши ҳам керак эмасди. Яхши майдон бўлганида, тўпни бемалол ушлаб олиш мумкин эди. Шу боис, майдонга кўпроқ эътибор беришларини хоҳлардим. Яхши футбол гувоҳи бўлиш учун майдон яхши бўлиши керак. "Бунёдкор" юқори стандартларга жавоб берадиган майдон ҳисобланади.