Самвел Бабаян: "Осиёда оддий рақиблар қолмади"

"Эртага бундай таркиб билан илк ўйинни ўтказамиз. Бизга берилган вақтда анча самарали меҳнат қилдик. Бироз олдинроқ маҳаллий футболчилар билан йиғин ўтказдик. Август ойи охирида эса легионерлар билан бирга йиғин ўтказдик. Бугунги кунда жамоамиз 100 фоиз тайёр эмас. Куни кеча ўтказган икки томонлама ўйин бизга кўп нарса бердик. Уни таҳлил қилиб чиқдик. Терма жамоадаги муҳит анча яхши. Ўйин фалсафасини сингдиришга уринаяпмиз", - дейди Самвел Бабаян.

"Эртага ғалаба қозонишга уринамиз. Яман ҳам яхши жамоа, уларни ўрганиб чиқдик. Тайёргарлик яхши ўтди", - дейди Сардор Рашидов.

- Олий лигада яхши спорт формасида бўлиб турган Шоҳруҳ Гадоев ва Шуҳрат Муҳаммадиев каби футболчиларга нима учун жавоб берилди?
- Терма жамоа барчаники бу футболчи мана бу клубдан, униси бундан деган нарса йўқ. Гадоев ва Муҳаммадиев терма жамоага номзод футболчилар ҳисобланишади. Аммо ҳозирги кунда таркибимизда ундан кучлироқ футболчилар бор. Барча ўйинчилар кейинги ўйинларга чақирилиши мумкин, барчаси ўзларига боғлиқ. Ҳозирги таркибимиз тарихдаги энг кучлиси.

- Андреев Гадоевдан кучлими?
- Ҳа Станислав Андреев ҳозирда Гадоевдан кучли.

- Яман қанчалик ўрганилди?
- Уларнинг иккита ўйин ўтказганини биламиз. Рақибни ўрганишга уриндик. Осиёда ҳозирда оддий ўйинлар йўқ. Бизнинг мақсадимиз Жаҳон чемпионатига чиқиш, демак фақат ғалаба қозонишимиз керак.



- Сардор сиз легионер сифатида илк бор терма жамоага чақирилдингиз. Босим йўқми?
Сардор Рашидов: - Йўқ ҳеч қандай босим йўқ, ўзимнинг бор кучим билан ўйнашга уринаман. Мухлисларнинг ишончини оқлашга ҳаракат қиламан.

- Ҳозирда чап қанот ҳимоясида Виталий Денисов бор холос. Агар мободо у жароҳат олса уни ўрнини ким босади?
 - Тўғри айтдингиз, футболда ҳар нарса бўлиши мумкин. Денисовни ўрнини боса оладиган йигитлар етарлича.

- Терма жамоамиз бир неча бор Жаҳон чемпионати саралашларида муваффақиятсизликка учраб келмоқда. Йигитларни қандай тайёрлаяпсиз?
- Таркибимизда ёш ва тажрибали футболчилар бор. Бир қатор футболчилар ёшлар ўртасидаги мундиалларда қатнашишган. Барчаси етук футболчилар. Терма жамоага келган футболчида руҳий томонлама муаммо бўлмайди.

- Сиз термага бош мураббий бўлганингизда легионерларга алоҳида эътибор қаратишингизни маълум қилгандингиз. Бу борада иш олиб борилдими?
- Албатта, сизларни ишонтириб айта оламанки барча футболчилар билан алоқага чиқдик. Уларга ўз мақсадимизни тушунтирдик. Барча йигитлар ўйинга тайёрлар. Александр Гейнрихнинг клубидаги ўйинларини кузатиб бордик, шу боис ҳам уни терма жамоага чақирдик. Хорижда ўйнаётган легионерларнинг барчаси ҳақидаги маълумотлар эртаси куни мени столим устида туради. Йигитларни кузатиб бордик.


Нарзулла Сайдуллаев