Рустам Абдуллаев: “Тартибли ўйин эвазига ғолиб бўлдик”

"Барачани келаётган Наврўз байрами билан табриклайман. Бугунги ғалаба осон қўлга киритилгани йўқ. Омадимиз келди, гол урдик ва ҳимояда ҳаракат қилиб натижани сақлаб қолдик. Йигитларга Қўқондан келган мухлислар ҳам ёрдам беришди. Барча мухлисларимизга раҳмат айтаман", - дейди Рустам Абдуллаев.

- Жамоанинг ғалабасига айнан нима таъминлади?
- Тартиб! Ўйин тартиби, айтишадику тартиб маҳоратни енгади деб.

- Ўйин сўнггида шогирдларингиз кўп бор майдонга ётиб олишди. Бунга муносабатингиз.
- Футболчиларимнинг оёғи тортишганидан кейин югура олмайди. Шу боис уни алмаштирдим.

- Ўз вақтида "Динамо"да ишлаб кетгансиз. Ўша пайтда эътибор қандай эди?
- Битта гап айтаман. Самарқандда ишлаганимда вилоят ҳокими тунгги соат 2да телефон қилиб эртага таркиб қандай бўлади деб сўрардилар (кулади). Эътибор қандай бўлганини тушуниб олаверинг.

- "Динамо" сафида кимнинг ўйини ёқди?
- Менга 33-рақамдаги (Николай Чипев) футболчининг ҳаракатлари маъқул келди. "Динамо" ҳам ёмон ўйнамади. Мавсум энди бошланмоқда, уларга кейинги ўйинларда омад тилайман.

- "Динамо"нинг голи ўйиндан ташқари ҳолат туфайли бекор қилинди...
- Тўғриси мен ўтирган жойдан офсайд бормиди йўқмиди билмайман. Битта ён ҳакам жамоам фойдасига хато қилди? Нима дейишга ҳам ҳайронман (кулади).

- Учрашувдан олдин "Қўқон" футболчилари билан гаплашдик. Уларга барча ойликлар вақтида тўланаётган экан. "Динамо"да эса бунинг акси. Бу ҳам ғалабага ёрдам бердими?
- Албатта, футболчилар ҳам инсон. Уларнинг ҳам оиласи бор. Ойликнинг ўз вақтида тўланиши жуда катта ёрдам беради.


Дамир Кабилов ёзиб олди