Роберт Варела: "Одатда мағлубиятдан хурсанд бўлмайдилар, аммо мен бугун хурсандман"

“Япония Осиёнинг энг кучли жамоаларидан бири ҳисобланади. Одатда мағлубиятдан хурсанд бўлмайдилар, аммо мен бугун хурсандман. Сабаби Япония таркиби сафида кучли футзалчилар кўп, шу боис ҳам тажриба устун келди“, - дейди мураббий.

- Бугун Австралиянинг гуруҳ босқичидаги энг яхши ўйини бўлдими?
- Чорак финалга чиқиб бўлганимиз учун бир қатор бошқа футзалчиларга имконият бердим. Жароҳат олган ва сариқ карточкалари бор ўйинчиларни асрадик. Сабаби бугун натижа муҳим эмас эди.

- Чорак финалда Таиланд ёки Вьетнам жамоаларидан бирига қарши ўйнайсизлар. Улар ҳақида нима биласиз?
- Жанубий Шарқий Осиё чемпионатида гуруҳ босқичида Вьетнам, финалда Таиланд билан ўйнагандик. Шу боис уларни яхши биламиз. Шу билан бирга рақиблар ҳам бизни яхши билишади. Чорак финалда ютган жамоа Жаҳон чемпионатига чиқади. Ким рақиб бўлса ҳам осон ўйин бўлмайди.

- Бугунги ўйинда кейинги учрашувдан олдин тактикалар синовдан ўтказиб олдингизми?
- Албатта биз навбатдаги беллашувга ҳам тайёргарлик кўрдик. Япония билан баҳсга мағлуб бўлиш учун тушмадик. Аммо вазиятга реал қараш керак. Тактикамизни синаб кўрдик, бироқ рақиб мусобақа фаворитларидан бири эди.

Нарзулла Сайдуллаев