Расмий хабар: Жасур Абдураимов – “Металлург” бош мураббийи!

Собиқ бош мураббий Андрей Шипилов ўз хоҳишига кўра истеъфо бергач, унинг ўрнига таниқли мутахассис Жасур Абдураимов “Металлург” ПФК бош мураббийи этиб тайинлади.

Бугун “Металлург” ПФК раҳбарияти Жасур Абдураимовни жамоа аъзоларига расман бош мураббий сифатида таништирди ва Жасур Берадоровичнинг келгуси фаолиятига омад тилади.

Абдураимов Жасур Берадорович 1972 йил 1 май санасида таваллуд топган. Футболчилик фаолиятини 1990 йилда “Шахтер” (Ангрен) жамоасида бошлаган. Турли йилларда “Умид” (Тошкент), “Навбаҳор” (Наманган), “Мелака” (Малайзия), МХСК (Тошкент), “Сўғдиёна” (Жиззах), “Зарафшон” (Навоий), “Пахтакор” (Тошкент), “Бухоро” (Бухоро), “Сурхон” (Термиз) жамоаларида тўп сурган.

Мураббийлик фаолиятини эса “Пахтакор” футбол клубида бошлаган. Ўзбекистон U-19, U-22 терма жамоалари устози сифатида фаолият олиб борди. Бир неча йиллар давомида “Пахтакор” ПФКда ишлаб келди: бош мураббийи вазифасини бажарувчи, бош мураббий ёрдамчиси сифатида фаолият юритди.

Жасур Абдураимов эндиликда “Металлург” ПФК бош мураббийи сифатида фаолиятини давом эттиради.