Расман: Ҳусниддин Ғофуров – "Металлург" аъзоси

Ўтган мавсумни "Сўғдиёна" жамоасида ўтказган ярим ҳимоячи Ҳусниддин Ғофуров "Металлург" жамоаси билан шартнома имзолади.

Ҳусниддин футболчилик фаолиятини "НБУ-Осиё" жамоасида бошлаб, қисқа муддат ичида  хориж жамоасига ўтиб кетган кам сонли ўзбек футболчиларидан бири саналади. 2013 йилда Сербиянинг "Явор" жамоаси билан шартнома имзолаган Ғофуров кейинчалик "Младость" клубида ҳам ўйнади. 

2018 йилдан эътиборан эса Ўзбекистон чемпионатига қайтди. Илк мавсумдаёқ "Локомотив" таркибида Ўзбекистон чемпионатида шоҳсупанинг юқори поғонасига кўтарилди. Кейинги мавсумда эса "Пахтакор" билан олтин медалга сазовор бўлди. Шунингдек, у Термизнинг "Сурхон", Олмалиқнинг АГМК, Фарғонанинг "Нефтчи" ҳамда Жиззахнинг "Сўғдиёна" жамоаларида ўйнади. 

Ҳусниддин Ғофуров икки карра Ўзбекистон чемпиони (2018, 2019), Ўзбекистон Кубоги соҳиби (2019). Суперлигада 105 та ўйинда майдонга чиққан, 8 та гол урган ва 13 марта сариқ карточка билан жазоланган.

Аввалроқ "Эшитдик-да" рукни остида унинг Бекобод клуби сафига қўшилгани ҳақида хабар берган эдик.