"Қўқон-1912": Машғулотлар давом этмоқда

Бахтиёр Ашурматов шогирдлари кунига икки маҳалдан машғулот ўтказишмоқда. Куннинг биринчи ярмида тренажёр залида шуғулланган футболчилар, кечки пайт майдонда тўп билан ишламоқдалар. Кеча бўлиб ўтган машғулотда ҳимоячи Алишер Саматов жиддий жароҳат олган. Шифокорлар Саматовнинг оёғи сингганлигини айтишмоқда. Алишер Саматов қанча муддатга сафдан чиққанлиги Тошкент шаҳрида бўлиб ўтадиган чуқурлаштирилган тиббий кўрикдан сўнг маълум бўлади. Биз футболчига тезроқ соғайиб майдонга қайтишини тилаб қоламиз.

Кечадан машғулотларга жамоанинг икки етакчи футболчилари , Мурод Холмуҳаммедов ҳамда Қувондиқ Рўзиевлар қўшилишди. Кечки пайт бўлиб ўтган машғулотлар, кеча туғилган кунини нишонлаётган, жамоа сардори Мурод Холмуҳаммедовни табриклаш билан бошланди. Жамоа аъзолари Муроджонга узоқ умр, мустаҳкам соғлик ва келгуси фаолиятига омад тилашди.

Бахтиёр Ашурматов бошчилигида ўтган машғулотларда футболчилар тўп билан муомала қилиш бўйича турли машқларни бажариб кўришди.