Пахтаободда маҳалла жамоалари ўртасидаги “Андижон вилояти ҳокими Кубоги” мусобақасининг финал ўйини бўлиб ўтди

18 ёшдан 30 ёшгача бўлган маҳаллий  футболчилардан тузилган жамоалар 1 августдан бошлаб “Вилоят ҳокими Кубоги”да иштирокини бошладилар.  Жамоалар биринчи босқични ўз секторларида ўтказиб, иккинчи босқич туман биринчилигига йўл олади. Ўз туманида ғолиб бўлган жамоалар вилоят босқичида тўп суради.

Пахтабод туманидаги 67 маҳаллалардан тузилган жамоалар 17 кун давомида беллашиб, тумани босқичининг финалига “Гулобод” ва “Муаззимбой” маҳалла жамоалари йўл олди.
Туман марказидаги ўйингоҳда ўтказилган баҳс пахтаободликлар учун оммавий сайил даражасида намунали ташкил этилганига алоҳида тўхталиб ўтиш лозим.    

Кўп сонли томошабинлар ташриф буюрган учрашув, мухлислар кутганидек жуда қизиқарли ўтди. Ўйиннинг асосий вақти 2:2 ҳисобида якунланиб, пенальтилар сериясида “Гулобод” маҳалласи футболчиларининг қўли балан келди. Энди улар мусобақанинг вилоят босқичида иштирок этади.
Туман миқёсида ғолиб  ва совриндор бўлган маҳалла футболчилари ва мураббийларига  туман ҳокими Маҳмуджон Бозоров, вилоят футбол ассоциацияси биринчи вице-президенти Бекзодбек Каримов, вилоят жисмоний тарбия ва спорт бошқармаси бошлиғи Ўткирбек Тошпўлатовлар самимий тилакларини билдириб, ташкилотчилар номидан диплом ва эсдалик совғалари топширишди.

“Жами 878 та маҳалла жамоалари иштирок этаётган мусобақанинг 17 кун давомида ўтказилаётган мусобақанинг туман босқичи финал ўйинларига етиб келдик. Энди барча туман ғолибларини маъсулиятли баҳслар кутиб турибди. Эълон қилинганидек, вилоятда биринчи ўринни олган жамоанинг маҳалласи худудига замонавий мини-стадион қуриб берилади. Совриндор жамоаларга эса катта суммадаги спорт жиҳозлари топширилади”,-дейди вилоят футбол ассоциацияси биринчи вице-президенти Бекзодбек  Каримов.

Мусобақанинг финал ўйини “Соғлом авлод” стадионида бўлиб ўтади.
   
Элмурод Эрматов, Андижон