Ўзбекистон терма жамоаси расмий машғулот ўтказди (ФОТО)

Расмий машғулотда йиғинга жалб этилган 28 футболчидан 25 нафари иштирок этди.

"Насаф" ярим ҳимоячиси Одил Ҳамробеков соғлиғи туфайли терма жамоа лагерини 1 июнь куни тарк этганди.

Ҳозирча легионерлардан фақатгина Анзур Исмоилов ва Фозил Мусаев йиғинга қўшилгани йўқ.

Терма жамоамиз сардори Одил Аҳмедов эса бугундан машғулотларга киришди. Аҳмедов бугунги машғулотни якка тартибда ўтказди.

Бугунги машғулотда кичик жароҳати саба Даврон Ҳошимов катта юкламали машқларда иштирок этмади. Ҳошимов эртанги баҳсда майдонга тушмайди. Даврон Ҳошимов Эронга қарши беллашувга қадар тикланиши ва сафга қайтиши кутилмоқда.

Катта эҳтимол билан эртанги учрашувда ўнг қанот ҳимоясида катта танаффусдан кейин терма жамоадан таклиф олган "Насаф" ҳимоячиси Акмал Шораҳмедов ўйнаши мумкин.

Ўзбекистон ва Таиланд терма жамоаларининг расмий машғулотида беназир кадрларни "овлаган" Толибжон Қосимов, эртага чиройли фотогалереяни тақдим этади.

Шунингдек, терма жамоамизнинг расмий машғулотини видео тасвирга туширган Зоир Турсунбоев ҳам эртага ажойиб роликни сиз азиз мухлисларга улашади.