Ойбек Қиличев: «Малайзияда яна бир йил қолсам керак»
19 окт 2016 09:30
Янгиликлар
![](https://championat.asia/upload/storage/224976_original.jpg)
![](/upload/storage/224976_220.jpg)
Ойбек Қиличев: «Малайзияда яна бир йил қолсам керак»
«Пахтакор»даги ўйинлари орқали танилган футболчи ўз вақтида Эроннинг «Пайкон» жамоасида ҳам тўп сурганди. Ойбек фурсатдан фойдаланиб, «Бунёдкор» стадионида кечган ЖЧ-2018 саралаши 3-раунди доирасидаги Ўзбекистон - Хитой учрашувини томоша қилди. Биз мазкур баҳсдан сўнг Қиличев билан учрашиб, ундан интервью олдик.
- Ойбек, термамизнинг ғалабали ўйини сизда қандай таассурот қолдирди?
- Футболчиларнинг Эрон жамоасига имконият бой берилганидан сўнг ўзларига келиб олишганидан хурсанд бўлдим. Одатда, бундай аламли мағлубиятлардан кейин қисқа фурсатда руҳий томондан муҳим ўйинга тайёрланиш, тикланиш осон кечмайди. Йигитлар мураббийлар штаби ёрдамида бу нарсани уддалашибди. Албатта, кетма-кет ўйинларда очко йўқотган хитойликлар Тошкентга мағлубиятга учраш учун келишмаганди. Буни улар биринчи бўлимда исботлашди, жуда яхши ҳимояланишди. Лекин танаффусдан сўнг термамиз футболчилари тамомила ўзгаришди. Бунинг натижасида рақиб дарвозаси икки бор ишғол қилинди.
- Эрон жамоаси билан баҳсдаги мағлубиятни қандай изоҳлайсиз?
- Бу каби муваффақиятсизликлар номдор термалар ўйинларида ҳам учраб туради. Эронликлар битта стандарт вазиятдан унумли фойдаланиб қолишди. Шундан сўнг футболчиларимиз катта устунликка эга бўлишди. Ўз навбатида, форсларнинг кучига ҳам тан бериш керак. Улар Корея жамоасини ҳам мағлуб эта олишди. Менимча, айнан Эрон термаси гуруҳимиз фаворити.
- Олдинда миллий жамоамизни Жанубий Корея термасига қарши сафарда муҳим учрашув кутиб турибди. Бу баҳсда ижобий натижага умид қилсак бўладими?
- Кореяликларга ортиқча таъриф бериш шарт эмас. Лекин ютқазмайдиган жамоанинг ўзи йўқ. 15 ноябрь куни ўтказиладиган ўйин олдидан гуруҳга назар ташлайдиган бўлсак, биз корейслардан юқорида турибмиз. Мана шу ҳолат футболчиларимизга руҳий устунлик тақдим этиши керак, деб ўйлайман. Ҳеч бўлмаганда, дуранг натижа қайд этилса, бу бизнинг фойдамизга хизмат қиларди. Шу билан бирга, кейинги турда Эрон термаси Сурия жамоасига қарши баҳсда очко йўқотади, деган умиддамиз.
- Ойбек, сиз спортчилар оиласида дунёга келгансиз. Акангиз Тўлқин Қиличев бокс бўйича Ўзбекистон терма жамоаси мураббийи ҳисобланади. Нима учун боксни эмас, футболни танладингиз?
- Ўзим Жиззах вилоятининг Зафар-обод туманида дунёга келганман. Мактаб йилларидаёқ миллионлар ўйинига бўлган меҳрим бўлакча эди. Қизиқишим сабаб Жиззах шаҳридаги футбол мактабига борганман. Ўша кезлари қишлоқдош дўстларимдан икки нафари айнан шу таълим масканида таҳсил олишарди. Ҳамон эсимда, отам ўшанда Тўлқин акамга «Укангни Чирчиқ олимпия захиралари коллежига олиб бор, у ҳам сен каби боксчи бўлсин», дегандилар. Лекин акам «Боксда нима қилади, футбол билан шуғулланишни давом эттираверсин», деб жавоб бергандилар.
- Бундан афсусланмайсиз, шундайми?
- Ҳечам афсусланмайман, акам тўғри қарор қабул қилган экан.
- Рио Олимпиадасида боксчиларимиз тарихий натижаларни қўлга киритишди. Мураббийлар штабида акангиз ҳам бор эди. Ўзбекистонлик чарм қўлқоп усталарининг жангларини кузатиб бордингизми?
- Албатта. Малайзияда деярли тонг саҳар бўлишига қарамай, боксчиларимиз иштирокидаги жангларни кўриб бордим. Улар орасида Баҳодир Жалолов, Муроджон Аҳмадалиев ўз укаларимдек бўлиб қолишган, Чирчиқ олимпия захиралари коллежида бирга улғайганмиз. Уйимизга тез-тез ташриф буюришарди. Ҳасанбой Дўсматовнинг олтин медални қўлга киритиши бошқа боксчиларимизни янада руҳлантирди. Фазлиддин Ғойибназаров ва Шаҳрам Ғиёсов ҳам ёрқин таассурот қолдиришди.
- «Пахтакор» жамоасида тўп суриш кўпчиликнинг орзуси. Сизга ҳам ана шу бахт насиб қилган. Бу клубга қандай келиб қолгансиз?
- Амаким Комил Қиличев 9-синфда ўқиб юрган кезларим «Трактор» жамоасига олиб борганлар. Ўша пайт бу клубга Вадим Абрамов мураббийлик қиларди. Бир ой мобайнида машғулотларда иштирок этганман. Яхши таассурот қолдирганман, чоғи, мени олиб қолишган. «Трактор» билан икки йиллик шартнома имзолаб, шу муддат давомида жамоада ўйнадим. Кейинчалик клуб тарқатиб юборилгач, Вадим Карленович ёнига чақириб, «Пахтакор»дан таклиф бўлаёгани, бир кун ичида ўйлаб кўришим лозимлигини айтди. Мен эса бунга бажонидил рози бўлдим.
- Ҳозир Малайзия чемпионатида ўйнаяпсиз, ундан аввал Эронда тўп сурдингиз. Легионерларга осон эмаслигини тушунгандирсиз?
- Албатта, хориждан ташриф буюрган ҳар бир футболчи маҳаллий ўйинчилардан бир бош юқори бўлиши шарт. Клублар сизни шунчаки таклиф қилишмайди, кўрикдан муваффақиятли ўтганингиздан кейингина шартнома имзолашади. Айниқса, Эронда ўйнаш қийин, жисмоний жиҳатдан жуда кучли бўлишингиз керак. Малайзияда эса нисбатан енгилроқ. Бугунги кунда уч нафар ўзбекистонлик футболчи ушбу мамлакат чемпионатида фаолият юритишмоқда. Дилшод Шарофутдинов ва Лутфулла Тўраев билан кўришиб турамиз. Ўзга юртда ватандошларингизни кўрганингизда қувонишингиз табиий.
- «Перак» билан шартномангиз қанча муддатга тузилган?
- Кейинги йили якунланади. Агар ҳаммаси жойида бўлса, Малайзия чемпионатида яна бир мавсум тўп сурсам керак.
К.АЛИМОВ суҳбатлашди
Ўхшаш янгиликлар
![AMP Logo](https://championat.asia/image/logo-amp.png)
Фикрлар