ОФК сўровномасида вьетнамлик футболчи Александр Гейнрихни ортда қолдириб ярим финалга йўл олди

Ўзига хос мусобақанинг чорак финалига қадар етиб келган ҳамюртимиз Александр Гейнрих "ўз юришини" тўхтатди. Маълумки, Гейнрихнинг Осиё Кубоги-2011да Жанубий Корея дарвозасига киритган голи энг яхшилар қаторида эди. 

Гейнрих чорак финалда вьетнамлик футболчи Ли Конг Винх билан баҳс олиб борди. 116,667 нафар мухлис иштирок этган сўровномада вьетнамлик футболчи катта фарқ билан кейинги босқичга йўл олди. Унга сўровномада қатнашганларнинг 96 фоизи овоз берган. Ҳамюртимиз эса атиги 4 фоиз овоз тўплади. 

Лекин бундан хафа бўлиш керак эмас, чунки ОФК ўтказадиган сўровномаларда Вьетнам ва Эрон олдига тушадигани йўқ. Бу икки мамлакат ўқувчилари бундай сўровларда жуда фаол иштирок этишади. 

Энди ярим финалда қаранг кимлар беллашади: ҳиндистонлик Сунил Четри билан ливанлик Аббос Чаҳрур ва индонезиялик Видодо Путра билан вьетнамлик Ле Конг Винх. 

Осиё Кубокларида шу пайтгача жуда чиройли голлар урилган. Эрон, Япония, Саудия Арабистони, Австралия ҳам бир қанча бир-биридан ажойиб голларни киритган. Лекин на илож ОФК сўровномасида "Энг чиройли гол муаллифи" деб бу мусобақада ҳали тарих ёзмаган жамоа аъзоси топилади.