Нохуш хабар. Синиша Михайлович яна касалхонага ётқизилади

Италиянинг “Болонья” клуби устози Синиша Михайлович яқин орада касалхонага ётқизилишини айтди.

Мутахассисда лейкемиянинг такрорланиши – қон саратони бор. Шуни таъкидлаш керакки, аввалроқ сербиялик мутахассис кимётерапиянинг бир неча сеансларини бошдан кечирган эди.

"Лейкемия қайтди: кейинги ҳафтада касалхонага боришим керак, аммо мен сизга яна бир дарс ўтиб қўйишга тайёрман", – деди у махсус матбуот анжуманида.

Эслатиб ўтамиз, Михайлович касаллиги ҳақида 2019 йилнинг ёзида эълон қилган эди. Мутахассис учта кимётерапия курсидан ўтди, кейин суяк илиги трансплантацияси амалга оширилди. Клуб сербиялик бош мураббийлик лавозимида ишлашда давом этишини, касаллик бунга тўсқинлик қилмаслигини айтганди.

"Болонья" Италия чемпионатининг 29-туридан сўнг 33 очко билан А Серия турнир жадвалида 12-ўринда бормоқда.