"Металлург" - "Бухоро" ўйинидан кейинги мураббийлар фикрлари

 Жамшид Саидов, “Бухоро” ФК бош мураббийи: - “Бухоро” учун ортга чекинишга йўл йўқ. Биз ҳар битта ўйинимизга охирги учрашувимиз сингари майдонга тушаяпмиз ва майдоннинг ҳар бир қаричи учун курашаяпмиз. Олдинги турда “Навбаҳор”га қарши учрашувда шогирдларим 7-8 та юз фоизлик голлик имкониятларни кўкка совуришганди. Бекободда ҳам ўйин қийин бўлишини билиб келгандик. Аммо бу ерда яратилган имкониятлардан унумли фойдаланганлигимиз учун Яратганга шукур қиламан. Олий лигада жон сақлаб қолиш умиди яна ошди. Тўғри, барча масала Жиззахда “Сўғдиёна”га қарши ўзаро ўйинда ҳал бўлиши кутилмоқда. Лекин бу футбол. Олдинда иккита ўйин турибди. Эҳтимол ҳаммаси бизнинг фойдамизга ўзгариб кетар. Буни жудаям ҳоҳлаган бўлардик.
 
Шавкат Саидов, “Металлург” ФК жамоа бошлиғи: Жамоамиз омадсизлик гирдобидан чиқиб кетолмаяпти. Ўтган турдаги аламли мағлубиятдан кейин бугун ўйинчиларнинг оёғига оғир тош боғлаб қўйилгандек ҳаракат қилишди. Учрашув бошидаёқ гол ўтказиб юборганлигимиз эса ишимизни янада оғирлаштирди. Катта куч сарфлаб, устунликни ўз томонимизга оғдириб олгандик. Ҳисобни тенглаштирдик ҳам. Лекин иккинчи таймда яна бир қатор яратилган имкониятлардан фойдалана олмадик. Оқибатда сен гол урмасанг, сенга уришади деган ибора яна ўз исботини топди. Ҳали яна иккита тур бор. Ҳеч бўлмаса ҳозирги мавқеимизни сақлаб қолиш учун курашишимиз лозим.