Машҳурлардан энг сара фикрлар

- "Ўйлайманки, еттита! Чунки етти - мен учун омадли рақам. Лекин бу келажак билан боғлиқ, ҳозир эса қўлимда турган совриндан роҳат олишни истайман". (2017 йилнинг "Энг яхши футболчиси" деб топилган Криштиану Роналду фаолиятини тугатгунча жами неча марта "Олтин тўп"ни қўлга киритишни ўйлаётгани ҳақида)

- "Сиз 22 турли фикрдаги ўйинчиларни бошқаришингиз керак, шунингдек сизни матбуот синчиклаб кузатиб туради, бундан ташқари стадион тўла ишқибозлар, бақир-чақирларни айтмайсизми. Юрак уриши 180га чиқиб кетади ва сиз ўйиннинг бошидан охиригача югурасиз. Бу дунёдаги энг яхши касб". (Германиялик аёл ҳакам Бибиана Штейнхаус нима сабабдан ҳакамликни танлагани ҳақида)

- "Тоттенхэм" фанатлари мени ёқтириб қолишганди. Улар номимни айтиб қўшиқ куйлаганда дастлаб мени ҳақорат қилишяпти деб ўйлаганман. "Нима учун исмимни айтишяпти?" Менга бу нарса бошида ёқмаганди, шу боис илтимос унақа қилманглар деганман". (Димитар Бербатов ўзи тўп сурган "Тоттенхэм" мухлислари ҳақида)

- "Мен онамни жуда қаттиқ яхши кўраман ва бу соврин унга тегишли. Онам менга берилган совғалар ичида энг каттаси ва энг қадрлиси. Мени ҳаммаёқдан қўнғироқ қилиб табриклашяпти. Бундан жуда хурсандман". (Тоголик Франсис Коне ФИФА "Фэйр плей" совринини олганидан сўнг айтган гаплари)

- "Унинг катта тажрибаси бор, у жаҳон чемпионатини ютган. Биз ҳам шу мақсад йўлида ҳаракат қилмоқчи эканмиз, орамизда шундай инсонлар бўлиши керак". (Бельгия термаси бош мураббийи Роберто Мартинес ёрдамчиси Тьерри Анрининг мураббийлар штабида тутган ўрни ҳақида)

- "Ёшлигимдан мураккаб ишларни бажаришга ўрганиб қолганман. Доим бир қарорга келишдан олдин юрагимга қулоқ солганман. Мен шундай инсонманки, қийинчиликлардан қўрқмайман ва доим енгиб ўтишга ҳаракат қиламан. Даврозабон бўлиб ўйнашнинг ўзиёқ характеримдан дарак беради". (Жанлуижи Буффон қандай характердаги инсон эканлиги ҳақида)

- "Буффон терма жамоада ўз дебютини нишонлаган пайт мен 14 ёшда эдим. Мен ўшандаёқ "Рома" учун ўйнардим, лекин терма жамоанинг ҳатто яқинига йўламагандим. Терма жамоада биринчи ўйинимни ўтказган пайт 16 ёшда бўлганман. Ўтган йиллар мобайнида катта ўсишга эришдим деб ўйлайман. Буффон 20 йилдан бери чўққида турибди ва унга бу борада ҳавас қилса арзийди. Терма жамоада ўйнаш қанчалик шараф эканини Жижи жуда яхши билади, унинг натижаларини такрорлаш қийин". ("Рома" ярим ҳимоячиси Даниэль де Росси ФИФА талқинига кўра, "Энг яхши дарвозабон" деб топилган Жанлуижи Буффон ҳақида)

- "У Месси ёки Роналду каби бўлиши мумкин, агар ўзига ишонишда ва қаттиқ меҳнат қилишда давом этса. Кейн жуда яхши футболчи, у янада ўсишга эришади, чунки ҳали ёш ва асосий фаолияти олдинда". (NBA юлдузи Коби Брайнт "Тоттенхэм" ҳужумчиси Харри Кейн ҳақида)