ОЧЛ. "Локомотив" - "Ал Иттиҳод" ўйинига оид маълумотлар

ТТЗ даҳасидаги "Локомотив" стадионида бўладиган баҳс соат 18:00да бошланади. Қуйида мазкур ўйинга доир баъзи маълумотларни келтириб ўтамиз. 

- "Локомотив" ОЧЛдаги учта ўйиндан иккитасида имкониятни бой берди. Умуман олганда, "Локо" охирги 8та учрашувдан бештасида мағлубиятга учраган. 

- "Локомотив" Жидда шаҳрида бўлиб ўтган биринчи учрашувда 2та тўп киритишга муваффақ бўлди. Бу эса жамоа қаторасига 7та ўйинда рақиб дарвозасига тўп киритганини билдиради. 

- "Локомотив" Саудия Арабистони клубларига қарши жами 9 марта майдонга тушиб, шундан фақат биттасида ғалаба қозонган. Ягона ғалаба 2016 йил мусобақанинг 1/8 финал босқичида "Ал Ҳилол"га қарши баҳсда (2:1) қўлга киритилган.

- "Локомотив" ярим ҳимоячиси Жамшид Искандеров ўтган турда рекорд ўрнатди. У захирадан тушиб гол уриш бўйича энг яхши кўрсаткични қайд этди. Искандеров майдонга тушганидан сўнг 1 дақиқа, 6 сония ўтиб гол урди. 

- "Локомотив" ички чемпионатнинг охирги турида "Бухоро" меҳмони бўлиб, 2:0 ҳисобида зафар қучди. Арслонмурод Аманов билан Темурхўжа Абдухолиқов томонидан киритилган голлар "темирйўлчилар"га навбатдаги 3 очкони тақдим этди.

- "Ал Иттиҳод" ҳозирча ОЧЛ гуруҳ босқичида 9та гол урди ва бу борада қолган жамоалар орасида энг яхши кўрсаткич қайд этиб турибди. 

- "Ал Иттиҳод" шу пайтгача Ўзбекистон клубларига қарши 15 марта баҳс олиб борган ва фақат иккита ўйинда мағлубиятга учраган. Жиддаликлар қаторасига 8 ўйиндан бери ютқазишмаяпти.

- Бу "Ал Иттиҳод"нинг Тошкентда "Локо"га қарши иккинчи ўйини бўлади. Биринчиси 2016 йил ўтказилган бўлиб, 1:1 ҳисоби қайд этилган. Учрашувда дастлаб Гелмин Ривас ҳисобни очган ва 89-дақиқада Сардор Мирзаев вазиятни тенглаштирганди.

- "Ал Иттиҳод" ўз тарихида икки марта (2004 ва 2015) Осиё чемпионлар лигасида ғолиб чиққан. Бу жамоа сўнгги бор 2014 йил гуруҳдан чиқишни уддалаган. 

- "Ал Иттиҳод" ички чемпионатда охирги ўйинини ўз майдонида "Ал Иттифоқ"қа қарши ўтказиб 2:0 ҳисобида зафар қучди. Бу жамоа турнир жадвалида 10-ўринни эгаллаб турибди.