“Ливерпуль” Мбаппе учун курашга киришмоқчи

El DesMarque хабарига кўра, “Ливерпуль” ПСЖ футболчисини таклиф этиш вариантини кўриб чиқмоқда.  Бу йўлда “қизиллар” Мадриднинг “Реал” клуби билан кураш олиб боришларига тўғри келади. Сабаби қироллик клуби ҳам 20 ёшли француз футболчисини қўлга киритишга аҳд қилган.

“Ливерпуль” футболчи учун 215 миллион фунт тикишга рози, шунингдек Мбаппенинг ўзига йилига 34 миллион фунт маош таклиф этмоқчи. Бу трансферда “Ливерпуль”ни устунлик томони шундаки, клуб ўтган трансфер ойнасида янги харидлар учун у қадар катта маблағ сарфламади. Шу боис молиявий фэйр-плей борасида ҳам “қизиллар” Зидан жамоасидан сезиларли устунликка эгалар.

Мбаппе кейинги йилнинг ёзида “Ливерпуль”нинг асосий нишонига айланиши кутилмоқда. Аммо бунинг учун Клоппжамоаси ҳужумдаги етакчи футболчиларидан биридан, хусусан Муҳаммад Салоҳдан айрилиб қолиши ҳам мумкин. Ўз навбатида қироллик клуби айнан мисрлик футболчини ҳам ўз сафига жалб этиш ниятида.

Бу орада яна бир қизиқарли ҳолат ҳам борки, у ҳам инглизлар фойдасига ишлаши мумкин. Кейинги мавсумда бошлаб “Ливерпуль” жаҳонга машҳур Nike фирмаси билан ҳамкорлик қилади. Килиан Мбаппе эса ушбу компаниянинг элчиси ҳисобланади.