Келиб чиқиши ўзбекистонлик бўлган Мануэль Янцер Германия чемпиони бўлган клубга ўтди

Трансфер ойнасининг сўнгги кунида у Германия 3-Бундеслигасида иштирок этадиган Брауншвейгнинг "Айнтрахт" клубига ўтди.

60-70 йилларда ушбу клуб Германиянинг энг кучли клубларидан бири эди. 1967 йилда "Айнтрахт" Германия чемпиони бўлганди. Бугунги кунда ҳам клуб жуда машҳур. Бироқ "Айнтрахт" бу мавсумни омадсиз тарзда бошлади ва ҳозирча 3-Бундеслигада сўнгги ўринда бормоқда.

Янцер мазкур клуб билан 2020 йилга қадар шартнома тузди.

"Брауншвейг жуда ҳам футбол шаҳри. Бу ерга жамоага ёрдам бериш учун келдим. Ҳа ҳозир клуб сўнгги ўринда, аммо мен 3 лигани жуда яхши биламан. Бу ерда жамоалар кўп бор пастга қулашади ва юқорига кўтарилишади. Иккита ўйинда ғалаба қозонилса мусобақа жадвали тепасида пайдо бўласиз. "Хольштайн Киль"га янги мураббий келди ва менинг хизматларимга эҳтиёж сезмаётганини айтди. Менинг клуб билан 2019 йилга қадар шартномам бор эди. Бир қатор клублардан таклифларга эга эдим, улардан бири Котбусдан эди. Аммо Брауншвейгдагилар мени келишимни кўпроқ хоҳлашди. Янги клубга имкон қадар тезроқ қўшилиб кетишни истайман. Жамоамга 100 фоиз ишонаман, буни илк машғулотларданоқ сездим. Яқин ҳафталар ичида буни барчага исботлашимиз керак", - дейди Янцер.

Маълумот учун, Мануэль Янцернинг отаси томондан қариндошлари Ўзбекистонда туғилган.