Ихтиёр Тошпўлатов: "Металлург"даги фаолиятимдан кўнглим тўлди"

Шундан кейин футболчи билан боғланиб фикрларига қулоқ тутдик. 

Якунланган мавсум ҳақида

- Мавсумни яхши тугатдик. Ўз олдимизга қўйилган вазифани бажара олмадик. Бундан яхшироқ ўринда якунлашимиз ҳам мумкин эди. Аммо баъзи баҳсларда омад етишмаслиги сабаб очколарни бой бердик. Кўп учрашувларда жамоага омад етишмай қолди.

Жамоани тарк этиши хусусида

- "Металлург" билан шартномам муддати 31 декабрга қадар эди. Менга бошқа жамоадан таклиф бўлгани сабабли клуб билан келишувни узайтирмасликка қарор қилдим. Шу сабабли яна 2-3 кундан кейин эркин агентга айланаман. 

Қайси жамоадан таклиф бўлгани борасида

- Ҳозирча буни ошкор қилмаганим маъқул. Тез орада янги жамоам номини билиб оласизлар. 

"Металлург"даги фаолияти хусусида

- У ердаги фаолиятим ўзимга маъқул келди. Жамоада ажойиб футболчилар йиғилганди. Биз бир оила бўлиб ҳаракат қилдик. Баъзида омадсизликлар бўлганига қарамай, бекободликлар сафидаги фаолиятим ўзимга манзур бўлди. 

"Сўғдиёна"дан таклиф ҳақида

- Йўқ, бу клубдан менга таклиф бўлмади.