Испания ЖЧ-2026дан воз кечишга тайёр — сабаб Исроил

Бу ҳақда Конгрессдаги Социалистик гуруҳ вакили Патчи Лопес маълум қилди.

Испания ҳукуматининг позицияси Исроилнинг халқаро спорт мусобақаларида иштирок этиши бўйича давом этаётган баҳс-мунозаралар фонида пайдо бўлди. Конгрессдаги матбуот анжуманида Лопес спорт ташкилотларини Исроил вакилларини мусобақалардан четлаштиришга чақирди.

Халқаро футбол федерацияси (ФИФА) ва Европа футбол ассоциациялари иттифоқи (УEФА) низомлари ҳукуматнинг миллий федерациялар ишларига аралашишини тақиқлайди.

Испания терма жамоаси айни дамда Туркия ва Болгарияни мағлуб этиб, икки ўйиндан сўнг олти очко билан саралаш гуруҳида пешқадамлик қилмоқда. Исроил ЖЧ-2026 саралаш гуруҳида бешта ўйиндан сўнг тўққиз очкога эга бўлиб, Италия билан иккинчи ўринни бўлишиб турибди. Саралаш босқичининг сўнгги ўйинида Исроил ўз майдонида Италияга 4:5 ҳисобида мағлуб бўлди.

Аввалроқ Испания томони Евровидение-2026 танловида Исроил иштирок этса, унда қатнашмаслигини эълон қилганди. Испания ҳукуматининг позицияси шундан иборатки, Ғазо секторидаги ҳарбий ҳаракатлар туфайли Исроил ва унинг вакиллари барча спорт ва маданий тадбирлардан четлатилган бўлиши керак.