Интервью. Давронбек Ҳошимов: “Жамоам мағлубиятга учраса, ичимдан йиғлайман”

Шундай ўйинчилардан бири майдондаги ҳақиқий жангчи, тўп учун курашда ўзини ҳам, рақибни ҳам аямайдиган 29 ёшли тажрибали ҳимоячи Давронбек Ҳошимов.

Ҳошимов мавсум – 2021 да 20 та ўйинда майдонга тушиб, 1800 дақиқа тўп сурди. Янги мавсумда ўз олдига юксак мақсадларни қўйган “Навбаҳор” тажрибали ҳимоячи билан тузилган шартнома муддатини узайтирди. Шу муносабат билан Давронбек Ҳошимовдан интервью олиб, унга ўзимизни қизиқтирган бир неча саволлар билан мурожаат қилдик. Табиийки, дастлабки савол футболчининг “Навбаҳор” билан тузилган шартномаси муддатини узайтириши билан боғлиқ бўлди.

- Ассалому алайкум! Янги мавсумда “Навбаҳор” ўз олдига юксак мақсадлар қўйган, - дея гап бошлади футболчи. - Буни амалга ошириш учун клуб раҳбарияти, мураббийлар штаби астойдил бел боғлаган.
- Албатта, Наманган вилоят ҳокими Шавкат Шокиржанович Абдураззақов, клуб президенти Отабек Арифович Саматов футболни теран тушунадиган, футбол ичидаги инсонлар. Шунингдек, янги мавсумда жамоани юртимизнинг таниқли мутахассисларидан бири бўлган Самвел Бабаян бошқаради. Самвел Вячеславович билан кўп йиллар давомида “Пахтакор”, шунингдек, бироз муддат “Локомотив”да бирга фаолият юритганман ва ушбу мураббийнинг қандай салоҳиятга эга эканлигини яхши биламан. Шу боис, 2-3 та клублардан яхши таклифлар бўлганлигига қарамай, келаси мавсумда “Навбаҳор”га Осиё Чемпионлар Лигаси (ОЧЛ) йўлланмасини қўлга киритишида ёрдам бериш мақсадида, клуб билан тузилган шартномам муддатини узайтиришга қарор қилдим. Янги мавсумда “Навбаҳор” мухлисларига қувонч улашишга интиламиз.

- Ўтган мавсумда жамоа 6-ўринни эгаллади ва табиийки, ушбу натижа қониқарли бўлмади. Сизнингча, жамоа совриндорлар сафидан жой олиши учун нима етишмади?
- Албатта, “Навбаҳор” сингари жамоа учун 6-ўрин ярашмайди. Бироқ бунинг ўзига яраша объектив ва субъектив сабаблари бор. Жумладан, илк турдан кейиноқ бош мураббийнинг алмашиши, 1-даврадаги айрим ўйинларда омадимизнинг келмаганлиги ва ҳоказо. Футболда ўзингизга маълум, янги мураббийнинг тактикасига мослашгунингизга бироз вақт талаб этилади. Иккинчи давра баҳсларида “Навбаҳор” ўзининг нималарга қодирлигини намойиш этиб, пешқадамларга ҳам муносиб қаршилик кўрсата олди. Бироқ 1-давра ўйинларида кўп очко йўқотганимиз якунда панд берди.

- Сиз учун “Навбаҳор”нинг ўтган мавсумдаги энг ёрқин ва энг аламли ўйинлари қайси учрашувлар бўлди?
- Ўтган мавсумда ёрқин ўйинлар кўп бўлди ҳамда улардан бирортасини алоҳида ажратиб кўрсатолмайман. Лекин энг аламли баҳслар сифатида “Сўғдиёна”га қарши кечган ўйинларни келтиришим мумкин. Жиззахликлар билан бўлган ҳар икки учрашувда ҳам 0:1 ҳисобида аламли тарзда имкониятни бой бергандик.

- Майдон ва унинг ташқарисида қайси жамоадошингиз билан яхши чиқишасиз? “Навбаҳор”даги дўстингиз ким?
- “Навбаҳор”даги барча футболчилар бир – бири аҳил-иноқ, дўст. Клуб қароргоҳида битта хонада истиқомат қилишимиз, шунингдек, амплуадошим бўлганлиги боис, кўпроқ Мирзоҳид Ғофуров билан яхши чиқишаман, кўп масалалар бўйича маслаҳатлашиб тураман. Шунингдек, дарвозабон Ўткир Юсупов, болаликдан бирга катта бўлганлигимиз боис, жамоамиз сардори Азимжон Аҳмедов билан ҳам яхши муносабатдаман.

- Футболга қай тарзда кириб келгансиз? Футболчи бўлишингизга ким сабабчи бўлган?
- Футболга болаликдан қизиққанман. Шу боис, мендаги қизиқишни пайқаган дадам 5-синфда таҳсил олаётганимда қўлимдан етаклаб, Янгиердаги БЎСМга олиб борганлар, яъни, футболчи бўлишимга отам сабабчи бўлганлар. Шу тариқа, футболдаги илк қадамларим бошланган.

- Оилангизда сиздан бошқа футболчи ёки спортчи борми?
- Оилада икки нафар ўғилмиз. Дониёр исмли укам бор. У ҳам футболни танлаб, Бекободнинг “Металлург” таркибида бироз муддат ўйнаганди. Аммо кейинчалик жароҳатлар безовта қилганлиги боис, айни пайтда бошқа соҳа билан шуғулланяпти.

- Вақти келиб, ўғлингиз футболчи бўламан, деса, уни қўллаб-қувватлайсизми ёки бошқа касбни танлашини маслаҳат берасизми?
- Албатта, фарзандим футболчи бўламан, деса, уни қўллаб-қувватлаб, қўлимдан келганича маслаҳат бераман. Ҳар қандай ота ўғлининг футболчи бўлишидан хурсанд бўлса керак.

-­ Мабодо футболчи бўлмаганингизда қайси касбни танлаган бўлардингиз?
- Тўғриси, бу ҳақда ўйлаб кўрмаган эканман. Таъкидлаганимдек, 11 ёшимдан футбол билан шуғулланиб, ўз олдимга футболчи бўламан, деган мақсад қўйгандим ва Худога шукр, ўз ниятимга эришдим. Бу ҳам бўлса, Аллоҳнинг инояти ҳамда тақдири. Футболчи эканлигимдан фахрланаман.

- Жамоангиз ёки терма жамоамиз аламли тарзда мағлубиятга учраганида ҳеч майдонда йиғлаганмисиз?
- Албатта, ҳар футболчи учун мағлубият анча аламли ҳолат. Ошкора бўлмасада, қайси клубда ўйнасам ҳам, ўша жамоа мағлубиятга учраса (шу жумладан, “Навбаҳор” ва терма жамоамиз ҳам), ичимдан йиғлайман. Бошқаларни билмадимку, лекин менда ҳар бир мағлубиятдан сўнг, жуда кучли оғриқ юз беради, 2-3 кун давомида ўзимни ёмон ҳис қиламан. Бир сўз билан айтганда, жамоамизнинг мағлубиятга учрашини ҳазм қилолмайман. Умид қиламанки, янги мавсумда “Навбаҳор”нинг ғалабали онлари кўп бўлади.

- Миллий терма жамоамизнинг янги устози Сречко Катанец сизни бош жамоамизнинг нобрь ойидаги ўқув-машғулот йиғинига чақирди ва Грузия термасига қарши кечган ўртоқлик баҳсида бошланғич таркибда майдонга тушдингиз. Терма жамоамиздаги машғулотлар жараёни ҳамда ўша ўйин ҳақидаги таассуротларингиз билан ўртоқлашсангиз...
- Словениялик мутахассис Сречко Катанец миллий терма жамоамизнинг сўнгги йиғинига чақирди ҳамда Грузия термасига қарши кечган баҳсда бошланғич таркибда майдонда тушиб, 45 дақиқа тўп тепишга муваффақ бўлдим.Умуман олганда, клуб билан терма жамоа машғулотларида катта фарқ бор. Терма жамоага юртимизнинг энг кучли футболчилари жалб этилишади. Грузияликлар билан тенгма-тенг ўйнаб, муносиб қаршилик кўрсата олдик. Фақатгина ўз дарвозамиздан ўтказиб юборилган тўп панд бериб, 0:1 ҳисобида имкониятни бой бердик.

Қисқаси, терма жамоамизнинг ноябрдаги ўқув-машғулот йиғинидан катта таассуротлар қолди. Бош жамоамизга айнан “Навбаҳор”даги ёрқин ўйинларим сабабли чақирилдим. 2018 йили ҳам мазкур жамоадан терма жамоага жалб этилгандим. Шу боис, фурсатдан фойдаланиб, “Навбаҳор” клуби раҳбарияти, мураббийлар штаби ва жамоадошларимга ўз миннатдорчилигимни билдираман. Худо хоҳласа, келаси мавсумда ҳам “Навбаҳор” шарафини муносиб ҳимоя қилиб, терма жамоа таркибидан ўрин оламан, деган умиддаман.

- “Навбаҳор” мухлисларига тилакларингиз...
- Кириб келаётган 2022 йил барча ҳамюртларимиз, шу жумладан, “Навбаҳор” мухлисларига ҳам омадли ва барокатли келсин, илоҳим! Жамоамиз мухлисларига тилагим, ўз жамоаларини қўллаб-қувватлашдан чарчашмасин. Биз – футболчилар эса уларнинг орзуларини рўёбга чиқариб, янги мавсумда Осиё Чемпионлар Лигаси (ОЧЛ) йўлланмасини қўлга киритишга ҳаракат қиламиз.

Маълумот учун
Давронбек Ҳошимов - 1992 йил, 24 ноябрда Сирдарё вилоятининг Сайхунобод туманида туғилган.
Футбол билан 11 ёшидан шуғуллана бошлаган.
Биринчи мураббийи: Тўрабек Эгамбердиев.
Янгиердаги БЎСМ, “Пахтакор” футбол мактабида таҳсил олган.
Амплуаси: ҳимоячи.
Ўйнаган жамоалари: “Пахтакор” (Тошкент, 2011 – 2017 йиллар), “Навбаҳор” (Наманган, 2018 йил – 2019 йилнинг 1-давраси), “Локомотив” (Тошкент, 2019 йилнинг 2-давраси – 2020 йилнинг 1-давраси).
2020 йилнинг 2-даврасидан яна “Навбаҳор”да.
Оилали. Икки фарзанд, яъни, бир қиз ва бир ўғилнинг отаси.
Мухлислик қиладиган жамоаси: “Реал” (Мадрид).
Ёқтирган футболчиси: Дани Карвахаль.