Ҳозир Тьяго Алькантаранинг кўчасида байрам бўлиши мумкин эди

Тьяго Алкантара ду Насименто. Испания терма жамоаси футболчисини мухлисларнинг бир қисми испан деса, бошқалар бразилиялик дейди. Қизиқарли томони шундаки, унинг ўзи Италияда туғилган. Унинг отаси Иомар ду Насименто ёки қисқача Мазиньо А Серияда тўп тепар эди. Бу воқеа 1991 йилнинг 11 апрелига тўғри келган. 

Дарвоқе, бугун “Тоттенхэм” хавбеки Бамидели Алли ҳам 24 ёшга қадам қўйди.

Алькантаранинг фаолиятига назар ташласак, у 2005 йилда “Фламенго” академиясидан “Барселона”нинг болалар жамоасига келиб қўшилган. “Кўк-анорранглилар”нинг асосий жамоасидаги дебюти 2009 йилнинг 17 майига тўғри келган (“Мальорка”га қарши ўйин). 2010 йилдан эътиборан у асосий жамоага жалб қилинди. Кейинги мавсумда Пеп Гвардиола 20 ёшли Алькантарани асосий таркибнинг тўлақонли аъзосига айлантирди(45 ўйинда 4 гол). 

Испаниялик мутахассис 2013 йилда “Бавария” бошқарувини қўлга олгач, жамоага таклиф қилган илк футболчиси айнан Тьяго бўлди. Ўша пайтда Алькантара учун МЮ ва “Реал” ҳам даъвогарлик қилган, аммо футболчи собиқ устози билан ишлашни авзал кўрганди. Футболчи мюнхенликлар учун 25 миллион еврога тушган.

У ҳамон “Бавария” таркибида муваффақиятли тўп суриб келмоқда.

Статистикага назар солсак, “Барселона” учун 100 ўйинда 11 гол, 20та самарали узатмага муаллифлик қилганига гувоҳ бўламиз.

“Бавария” таркибида эса унинг ҳисобида 227 ўйин, 31 гол ва 37та асист бор.

Тьяго қўлга киритган соврилар билан танишинг:

4 карра Испания, 6 карра Германия чемпиони;

2 карра Испания, 3 карра Германия кубоги соҳиби;

3 мартадан Германия ва Испания суперкубокларида ғалаба қозонган;

2 каррадан ЕЧЛ, УЕФА суперкубоги ва клублар ўртасидаги ЖЧ ғолиби ва ҳ.к.

Хуллас, бутун жаҳон аҳлини қийнаётган коронавирус пандемияси туфайли Тьяго ҳам ўз таваллуд айёмини аввалгидек дабдабали ва кенг миқёсда нишонламаслиги аниқ. 

Буни сизга ҳам маслаҳат бермаймиз. Ўзингизни ва яқинларингизни асранг. Бунинг учун, шунчаки, уйда қолиш кифоя қилади. Сиқилманг, аҳвол ўнглангач, бундай байрамларнинг энг катталари айнан сизнинг кўчангизда бўлади. #уйда қолинг!

Фахриддин Рўзиев