Германия – Ўзбекистон учрашуви “Бунёдкор”да

“Бунёдкор” стадиони ресторанида учрашувни катта экран қаршисида томоша қилиш ташкил этилди. Маросимда Германия Федератив Республикасининг Ўзбекистондаги элчихонаси ходимлари, футбол жамоатчилиги вакиллари, журналистлар иштирок этишди.

Учрашув бошланиши арафасида “Бунёдкор” ФК Биринчи вице-президенти – Бош директори Бахтиёр Бобоев ҳамда Германиянинг Ўзбекистондаги фавқулотда ва мухтор элчиси жаноб Найтхарт Хёфер-Виссинг сўз олишиб, жамоаларга омадлар тиладилар.

Танаффус пайтида Ўзбекистон ва Германия футболи тарихига оид саволлар асосида қизиқарли викторина ташкил этилди. Ғолибларга “Бунёдкор” ФК томонидан тайёрлаб қўйилган совғалар топширилди.

Учрашув якунлангач, ўйин натижасини тўғри топган (аввалдан тарқатилган купонга тўғри ҳисоб ёзиб қолдирган) мухлисга махсус совға топширилди. “Бунёдкор” ФК президенти Бедил Алимов ва ГФРнинг Ўзбекистондаги фавқулотда ва мухтор элчиси бир-бирларига футбол тўпларини совға қилишди.

Жаноб Найтхарт Хёфер-Виссинг ташкилотчиларга алоҳида миннатдорчилик билдириб, “Бунёдкор” вакилларини Берлинда бўлиб ўтадиган УЕФА Чемпионлар лигасининг финал учрашувини томоша қилишга таклиф этди.

Тадбир фотожамланмаси билан ушбу ҲАВОЛАга ўтган ҳолда танишишингиз мумкин.