Февзи Давлетов: "Пахтакор" биз кутгандай ўйнади, барча режаларимиз иш берди"

Ўйин ҳақида

— Бўлим бўлим тактик жиҳатдан ўтди. "Пахтакор" вертикал ва узун узатмалар орқали ўйнашини билардик. Бунга қарши тура олдик. Танаффусда эса вазиятлар бўлишини айтгандик ва гол уриш кераклигини таъкидлагандик. Яримта вазиятдан ҳам фойдаланиб кетганимиз яхши бўлди. Тўп ўтказиб юборганимиз эса ёқмади, шундай вазиятларда ва тўпни эгаллаш чоғида охиригача ўйнамаяпмиз. Бундан ташқари, захирадан ўйинга қўшилганлар яхши ўйнай олишмади. Умуман олганда, йигитларни табриклайман, шунингдек мухлисларимиз ҳам табриклаш учун келишди.

— 22 йилдан сўнг Термизда ғалаба қозонганимизнинг ўзи билан тарих бўлди, бунинг учун раҳмат. Сўнгги ўйинларни кузатадиган бўлсак, "Сурхон"да фақатгина чап қанот ишлаяпти. Достон Турсунов умуман ўйинни назорат қилмоқда. Асилбек Жумаев ва Суннатилло Ҳамиджонов фақатгина ўнг қанотга узатмаларни амалга оширмоқда. Негадир ўнг қанотимиз заиф, бунинг сабаби нимада?

— Ҳа, "Машъал"га қарши ўйинда ҳам ўнг қанотда фаоллик етишмаганди. Йигитлар бундай ўйинга тўлиқ борларини беришлари кераклигини тушунишлари керак. Ҳар икки қанотда ҳам устунлик бўлиши керак. Суннатуллоҳ Ҳамиджонов ва Суннатилла Пойоновда қандайди қўрқув ёки дискомфорт борми, билмадим. Ҳужумда кўпроқ фаоллик керак.

— Бугунги ўйиндан олдин Кубок баҳсида ротация қилгандингиз ва буни "Пахтакор" билан ўйинга эътиборингизни қаратишингиз билан изоҳлагандингиз. Бугунги ўйинда "Пахтакор"дан нима кутгандингиз?

— Бугун кўрганларимни кутгандим, бошқача ўйин йўқ. Уларнинг Термизга келишидан бироз хавотир бор эди, аммо биз жамоавий ҳаракат қилиб, ажойиб ўйнадик. Ўйиндан олдинги режаларимиз амалга ошди.