Фаластинда футбол давом эттирилади

Бу ҳақда федерация президенти Жибрил Ражуб клублар билан мулоқот чоғида маълум қилди. Коронавирус пандемияси сабаб Фаластинда ҳам март ойида футбол ўйинлари тўхтатиб қўйилганди. Лекин эндиликда вазият анча юмшагани боис миллий чемпионат яна давом этадиган бўлди. 

Бу ҳақда федерация раҳбари шундай деди: "Фаластин футбол федерацияси клублар билан ишлашни мақсад қилган. Биз нима бўлмасин бу йилги чемпионатни тугатиб қўйишимиз керак. Биз клубларни ва футболчиларни ҳимоя қилишда давом этамиз, чунки ҳаммамиз учун энг муҳими соғликдир. Чемпионат ўйинлари давом этади, фақат бунинг учун клубларга тайёргарлик кўриб олишлари учун икки ҳафта муҳлат берамиз. Шундан сўнг ўйинлар тўхтаган жойидан давом этади". 

Маълумот учун, Фаластинда миллий чемпионат тугашига уч тур қолган. Учта тур учрашувлари уч кунда бўлиб ўтказилади. Бунинг учун мамлакат шимоли, жануби ва марказидаги стадионлар танлаб олинади ва ўйинлар шу ерда бўлиб ўтади. Чемпионат баҳслари мухлисларсиз тугатиб қўйилади.