Каннаваро: "ВАР протоколини ҳозироқ ўзгартириш лозим - хатолар чемпионат натижаларига таъсир кўрсатиши мумкин"

Ўзбекистон терма жамоаси бош мураббийи, Италия терма жамоасининг собиқ ҳимоячиси Фабио Каннаваро "Интер" ва "Ювентус" ўртасидаги ўйиндаги ҳакамлик можароси ҳақида фикр билдирди.

А Сериянинг 25-турида "Интер" жамоаси 3:2 ҳисобида ғалаба қозонди. 42-дақиқада туринликлар ҳимоячиси Пер Калулу Фабио Миреттининг ноаниқ узатмасидан сўнг Алессандро Бастонининг оёғига зарба беришига сал қолди. "Нерадзурри" футболчиси контакт бўлганини симуляция қилиб, майдонга йиқилди, бош ҳакам Федерико Ла Пенна эса "Ювентус" ҳимоячисига иккинчи сариқ карточкани кўрсатди. Симуляция қилган Бастони рақибининг ўйиндан четлатилганини кўриб, қувончини яширмади.

"Бастонини терма жамоадан четлатиш керакми? Нима учун у ўша ерга бормаслиги керак? Бундай ҳолатлар доим бўлган ва бўлади, футболнинг бир қисми бу. Бундай эпизодларни текшириш учун имкониятлар бор. Лекин ВАР протоколи бунга йўл қўймайди.

ВАР мавжуд экан, ким хато қилганидан қатъи назар, ундан фойдаланиш шарт. Агар жорий этилиши йиллар давомида кутилган восита бўлса, ундан ҳар доим фойдаланиш керак.

Биз протоколни келгуси йили эмас, айнан ҳозир ўзгартиришимиз лозим, чунки чемпионат натижаларига таъсир қилиши мумкин бўлган хатолар туфайли ўйинлар бузилаётгани ачинарли ҳолат," - деди Каннаваро.